越旺美食 (已結業)

大角咀變變吓，可以講越嚟越變得喺平民嘅美食天堂，尤其喺埃華街、大全街、中匯街，可以講喺食街嚟，當中有唔少更喺卧虎藏龍嘅小店。早前有街坊食友試過呢間「越旺美食」，強力推薦，話性價比高，所以，今晚就同多年老友嚟試試，大家都喺鍾意飲飲食食，人大咗，搵食嘅閱歷就會越嚟越多。從鋪面已經可以清楚睇到餐廳內籠，第一印象喺整潔光猛，再踏進餐廳，原來都幾大，除咗正面嘅用餐區，入少少靠左仲有一大片用餐區，坐滿嘅話都幾墟冚。而裝修方面，就比較簡約，唔會話太多越南呀、泰國呀嘅裝飾，都只喺牆上掛啲食物相。不過，無論挨牆嘅，獨立嘅，啲梳化櫈都頗為舒服好坐。全場有一張大圓枱，基本上喺坐8個人，逼少少可以坐到9個，啱晒一家族人嚟食飯，圓枱點都方便傾偈好多。餐廳採用二維碼落單，當然你叫阿姐幫手都喺無任歡迎。打開餐牌睇睇，選擇非常之多，一起手就係啲升級加配，跟住就有越式湯粉檬、越式飯類、炒飯炒河、秘製咖喱、超多款越南小食、海鮮類、煲仔類、蔬菜類以及各式飲品……等等。此外，仲有幾款晚市2人餐（$220-$280）、3人餐（$380-$410），計落當然比散點划算好多。雖然三人餐夠豐富，不過佢哋又想試個招牌奶油蝦，所以就揀咗個二人餐（B餐, $230）搭過招牌奶油蝦，夠晒三個人食，仲無加一服務費添，讚呀！順帶一提，講講招呼，雖然有啲阿姐好似有少少生手，但服務殷勤，態度有禮搭夠，好似一坐低，就主動俾杯熱水消毒吓筷子，醒目！越式蒸粉卷（二人餐）蒸粉卷一客有4件，做得的的骰骰，灑上炸蒜片、蔥油，外皮真喺唔錯，既薄且滑，薄到透出裡面嘅餡料，而內裡塞滿木耳絲、甘筍絲、粉絲，沾啲魚露感覺就更清爽。 馬拉盞炒通菜（二人餐）除咗通菜，仲有多款時菜可以揀，如芥蘭、菜心，不過，配馬拉盞都喺通菜夾啲。馬拉盞即喺馬拉蝦醬，鹹香惹味，加上通菜鮮嫩爽口，令馬拉盞嘅風味盡顯！ 越式咖喱羊腩煲（二人餐）+$20咖喱煲可以揀印度咖喱或越南咖喱，辣度亦有選擇（1到5級），而肉類可以揀牛腩、雞肉或羊肉，難得老友都食羊，我哋就當然加錢揀羊肉啦！唔喺講笑，非常大煲，份量勁足，當然，下面都墊有少少薯仔、三色椒、蕃茄同生菜。我哋就試咗越式咖喱，唔似印式咁重香料味，相反加咗椰奶，比較香滑，微微辣；啲羊肉好正，肉質鬆化，帶陣陣羊羶香，鍾意食羊嘅人一定啱口味。最貼心喺下面有火酒糕熱住，食到尾都仲喺熱焫焫嘛！馬來奶油蝦 $110作為招牌菜之一，梗喺好想試吓啦，一客份量唔少，足8隻大大隻鮮蝦，擺得整齊，而且，鎅晒背方使便食之餘，更入味。精髓當然喺個馬拉風味嘅奶油汁啦，奶油汁口感頗為厚身，味道濃郁，而蝦肉爽口鮮甜，絕對喺新鮮貨色，墊底仲有少少粉絲，掛滿汁，好食。薄餅 +$8套餐配有白飯，但當然加少少錢轉一客薄餅啦，啲薄餅好有油酥香，口感一流，無論沾上咖喱，抑或奶油，都好好食。三色冰 +$15轉特飲有半價優惠，事先已上網睇過人家嘅食評，介紹到呢一款「三色冰」，賣相靚，已經好想試。大大杯椰奶，杯底有開邊綠豆、紅豆，再加開邊綠豆，如果晌杯邊再倒少少椰糖綠，相信賣相更正。椰奶好香滑，啲豆豆軟腍清甜。龍眼冰 +$15老友就揀咗龍眼冰，其實，呢款特飲我都鍾意。睇色澤都覺得唔錯，老友就話個糖水底清甜，好潤；而裡面有唔少龍眼肉，呈深啡，就知唔喺罐頭貨，入口龍眼獨特嘅味道特別濃，甜味自然。都話有唔少臥虎藏龍啦，果然呢間都好唔錯，幾款食物都做得好食，加上份量足，價錢又相宜，地方大，又坐得舒服，值得再撐嘅小店。…查看更多

約左住附近嘅朋友食個lunch，之後順便去旺角街市買餸。天氣熱唔想食飯，所以揀左食越南野。越旺店面都算大，地方光猛企理，雖然有個越字，但其實都有其他東南亞菜同港式碟頭飯，例如喇沙、咖哩等等。香茅豬扒河($49) - 豬扒已經預先切件方便食，肉質唔會太韌太鞋，河粉都幾薄幾滑，河粉量都算多。越式金牛河($71) - 金河牛好大碗，入面有生熟牛肉、牛丸、牛腩同牛肚，非常足料，湯底用牛骨煮成，牛味清甜唔過油，食完都唔覺口渴。越式炸蝦餅($28/半客) - 所有粉麵飯都可以用優惠價追加小食，份量大約係正常size一半。蝦餅蝦味十足，非常彈口，蘸埋甜酸醬食更好食。越式蒸粉卷($20/2件) - 蒸粉卷唔係間間越南食店都有，哩度嘅蒸粉卷粉卷皮唔會太厚，入面釀滿沙葛、紅蘿蔔、木耳、洋葱、芫荽、豬肉，口感非常豐富，就咁蘸魚露食已經好食。越式小食拼盤($88) - 拼盤有雞翼、越南春卷、串燒、扎肉同蝦片扎肉，足夠二至四人share食。雞翼同春卷幾香脆但又唔會太油，串燒肉質軟嫩，沙嗲味都幾香。椰汁綠豆冰 & 菠蘿紅豆冰(跟餐半價$14/杯) - 跟餐特飲半價，椰汁綠豆冰幾重椰汁味，除左綠豆，仲有啲珍多喺入面。菠蘿紅豆冰入面都有幾舊菠蘿，紅豆亦煲得夠腍。總結，野食唔錯，份量都好足，環境亦乾淨企理，仲唔收加一。…查看更多