經過旺角呢間小店，有芋圓又有吐司，兩樣我都好鍾意食😍見到個餐牌有咸蛋肉鬆芋泥球，即刻叫咗一個，等緊嘅時間，我又諗諗吓既然自己咁肚餓，不如食多一份台式肉蛋芝士吐司當午餐食，再叫多一支桂花烏龍茶。由於所有食物都係即時製作，所以飲一邊等一邊嘆啖桂花烏龍茶，支烏龍茶好清香，唔澀，入口順滑，唔錯！我最期待嘅咸蛋肉鬆芋泥球新鮮熱辣送到嚟枱面，芋泥球大約一個手心咁大嘅size，咬落有少少甜味嘅芋泥，再加上埋肉鬆及咸蛋嘅鹹味，出奇哋好夾！食完嘅同時，嗰份吐司嚟啦！撕開份吐司後，入邊啲蛋汁流晒出嚟，咬第一啖後，滿口都係芝士香味，加上入面有少少甜味，我估搽咗美乃滋醬，夾住一塊薄薄嘅豬扒，好有驚喜呀！好似去咗台灣食台式吐司嘅味道，勁滋味！不過食咗半份後，我發覺芝士味太重又鹹，蓋過哂入面嘅美乃滋醬味，下次都係唔好加芝士好啲！同行嘅朋友就揀咗黑松露芝士飛驒牛竹炭包，一口咬落去個竹炭包面好脆，加上黑松露香味簡直刺激味蕾，漢堡扒好多肉味，唔錯，幾足料！芋圓甜品好吸引我，忍唔住叫咗一碗蜜芋頭撈三色圓，午餐食甜品簡直係好crazy🤪!熱辣辣嘅芋泥加一舊舊嘅芋頭，甜味啱啱好，唔會太甜。所謂三色圓分別有黃色地瓜圓、紫色地瓜圓同埋芋頭圓，咬落好煙靭，好Q呀！雖然黑布小巷有堂食，只係喺冷巷放幾張枱，但仍然好多人喺度等位堂食，有啲叫外賣，香港少有嘅台灣風味小店，味道不錯，店員有禮貌，日後我會繼續大大支持你，加油💪🏻香港🇭🇰小店！…查看更多
