養生糊甜品專門店 (已結業)

之前睇過介紹話依間傳統中式糖水舖以前喺北角書局街開店，由店主兩夫婦一手一腳打理，不過因為雙手勞損而結業。而家喺炮台山重新開業，作為街坊當然要幫襯下啦！舖頭門面同出面都放咗有附圖嘅menu，清晰易睇，價錢相宜，更加有介紹每款糖水嘅食材功效，可以揀番碗啱自己嘅中式糖水。小店雖細但都有提供座位可以即場食。依排芋頭當造就嗌咗碗香芋椰汁西米露－老闆有問要唔要加奶，不過想試真啲個椰汁香就冇加到。芋頭軟綿好香，西米煮到透身，甜度適中，食完都幾飽肚。之後買咗碗芝麻糊同蛋白杏仁露返去同屋企人分享。芝麻糊係小店嘅招牌，到而家都堅持人手炒香用石磨生磨，絕對唔用粉開。芝麻糊香濃滑溜，低糖份夠健康，有黑髮、通便、潤膚嘅功效。好多人會怕杏仁陣味，但我就好鍾意（可能因為由細聽媽媽講飲杏仁茶對皮膚好）。蛋白杏仁露真材實料，味道好香而且入口順滑，滑捋捋嘅蛋白融入咗喺杏仁露入面，每啖都好滋味，食完真係有潤肺養顏嘅感覺。到而家仲有咁用心專心製作中式糖水嘅舖頭真係好難得，希望有更多人認識到依間小店支持下！…查看更多

依日放工去開天后朋友屋企睇波，我哋就買齊嘢食上去開餐😆。除咗正餐外，我哋仲買埋糖水添，咁就唔洗等踢到半場先落街買。朋友話蜆殼街有間新開嘅中式糖水舖，就一於試下。除咗正街嘅老字號外，中式糖水舖真係買少見少呢。舖仔細細，似由一家人經營，堂食嘅位置不多，多數人都係買外賣，就好似我哋咁😚。糖水價錢好平，一碗平均都只係$20-$22，今時今日邊到搵👍？糖水有成十數款揀，款款都係經典，各有功效😊。糖水舖係用一個個鐵兜裝住啲糖水，全部都係熱辣辣滾住，無得輸，真係好有經典嘅感覺😜。我哋要咗三碗Share食，分甘同味😋。蛋白杏仁露($23/熱)，食材功效包括平氣止咳同養顏，但孕期不宜。杏仁茶好香，夠哂濃味，而且同蛋白好夾🥚，食落又夠滑。桑寄生蓮子蛋茶($20/熱)，食材功效包括安神、益肝腎同緩經痛。依個同我食開嘅唔太同🙈，藥材味比較濃厚，所以較苦澀，有啲似涼茶，哈哈。不過口味因人而異嘅～。木瓜雪耳露($20/熱)，食材功效包括滋陰潤肺同益脾胃。哇呢碗糖水嘅雪耳多到一個點😍，正，好滋補，而且仲有紅棗添，好啱女仔。總括嚟講，平平地想食碗中式糖水嘅話，呢到絕對係一個好選擇😎，味道都唔錯啊！…查看更多