今日聲稱係59年嚟最凍嘅一日，香港普遍溫度都係個位數，全日新聞FACEBOOK洗版都係講落冰粒，山頂結霜，我只係知我今日出街著到隻糉咁都係凍到入心，咁梗係比個藉口自己食番個雞煲先啦。 呢間過江龍本店開喺元朗，喺區內都薄有名氣，今次選擇喺官塘開新店，仲要開喺夜晚人跡罕至嘅瑞和街，可知佢對自己嘅出品信心十足(又或者係租金問題)，位置偏僻，但難唔到我呢個官塘地膽。店面細細，大概得八張枱，好彩預先訂枱，否則一定有排等。 爺爺招牌雞煲(大-2斤半重)$198既然叫雞煲皇，梗係要試吓爺爺招牌雞煲啦。雞煲用沙茶醬同辣椒油醬做膽，再用上湯蒜頭乾葱炒香雞件煮成，汁底濃郁，帶少少甜味同酒香，辣醬惹味，最緊要雞件新鮮，上枱配芫茜、葱段再煮5分鐘左右已經入晒味，食完渾身和暖，停唔到口。忍唔住連食兩個大雞煲先再叫火鍋料。所以唔係猛龍唔過江，難怪夠膽由元朗開到官塘。 餐廳為每枱準備好一壺上湯，等食完雞煲後可加湯變陣打邊爐。食完雞件即刻再試其他火鍋料。 手切本地肥牛$188牛肉極新鮮，無雪味，只係放湯焯至僅熟，淨係索咗雞湯己非常夠味，鬆化牛味濃。 其他火鍋料都係同其他餐廳大同小異，但價錢實惠，由$22起，由於食咗兩份雞煲，其他生料，要留待下次ENCORE再試過喇。…查看更多
