五黃一藍五白一黑職工用膳，小勝一仗熱烈慶祝，河已完沙嗲牛肉火鍋﹗老闆話唔齊人唔比入，人都癲火都黎！那我依家一個人攞枱打邊爐，如果我朋友到就加多個位得唔得？我好頸渴依家就要飲啤酒！自己係要攞架黎掉，最後咪都要比我入座先！無蟹無龍蝦，要訂訂位時又唔講！有大量新奇產品提供，要幫襯多兩三次先可以試得完。到底極品牛肉皇是什麼，要索價 $2500 蚊碟呢？可以食塊頂級日本神戶牛柳喎。碳爐的外表，石油氣燱的內涵。只有坐大枱才有兩個爐頭呢，貪心的食家們當然要兩款不同風味，清湯拼沙嗲湯。免費的辣椒豉油，如要蒜蓉、蒜酥、蔥花、莞茜、指天椒，全部收錢。食飽飽埋單一出門口廿幾三十個食客非法集結門口等位，有無咁好食呀？花竹蝦再加星級牛肉、手切金錢腱、羊肉卷、炸魚皮、豬心、狗肚魚、花竹蝦、蟶子、鵝腸、魚鰾、伊麵、等等等等。食唔到龍蝦死心不息打電話訂都係無貨，早知自己買啦！青島啤酒，無日本啤唯有穩陣清島濕濕口。沙嗲湯，招牌湯底因您而來！散發路邊古法港式串燒沙嗲味道，非常使人懷念無得頂，有別於平時茶記沙嗲牛肉麵的味道，香氣質地根本係天淵之別，豐富多層次複雜的味道使人回味！清湯，師傅稱係魚清湯來的，但完全食不到魚味，發現只有一磚豆腐沉底。我趁大家忙著食牛肉時已據為已有，淋上辣椒豉油嫩滑自嘆。清湯點解豆腐內藏機關呢？聞名不如見面，首次遇到番茄湯底會係滾水烚鮮茄！差不多尾聲個番茄湯底依然從來未滾起過，到最後終於變成紅色。鮮番茄鮮甜多汁爽爽開胃，番茄湯加上大量蔬菜肉類的精華美味到升天！頂好大光麵，為了今餐連午飯都無食，餓到慌的我一坐底就食碗麵打個靚底先，意想不到大光麵可以好食到如此地步﹗可能連出前一丁不及大光麵跟沙嗲湯合襯，真心天衣無縫無與倫比！厚厚的湯汁零死角完全擁抱每吋麵條，環環緊扣，汁液香而不辣，甜味極致！熱騰騰讓爽彈的麵條拖著大啖大啖地啜，滿足幸福感覺直湧心頭！頂級手切牛肉，叔叔表示係牛頸脊來的，甜甜濃郁牛味突出，滑得黎好有咬口，優質無投訴。手切牛肉，比牛頸脊更軟綿幼嫩，牛味較為清爽，同樣高質美味。星級牛肉，跟手切牛頸脊不相伯仲，前者食其彈牙重牛味，後者食其嫩滑甘甜豐富油脂，靚靚的脂肪網絡襯托著嫩紅色。手切金錢腱，獨特的嚼勁與牛甜味，牛汁澎湃飛射。牛脷，薄切大大塊脷，處理乾淨無脷胎，只有甜味無腥味無羶味，微爽嚥韌食得過。黑牛柏葉，絕對要打醒十二分精神十秒極速救起，爽脆無窮，牛汁微滲，烚過火會變成橡膠趙到牙骹軟。珍珠蠔仔，新鮮度強差人意，腍劈劈腥氣迫人，最後唯有烚到變成蠔豉，縮到豆豉般迷你搭埋濃濃沙嗲汁，免強搞掂。游水海蝦，生猛紮紮跳萬馬奔騰不停踢腳，立即下鍋免除不必要痛苦，早登天國阿門！爽甜彈牙蝦味極鮮，蝦膏甘香啜得痛快。游水花竹蝦，即撈即串仍然不停奔跑，生龍活虎！爽彈爆膏勁多肉汁，鮮甜到飛天無得頂﹗游水大墨魚，即叫即撈即劏，師傅話可以刺身可以打邊爐，大家異口同聲想熱食，我一向都覺得打邊爐就打邊爐，食什麼刺身呢？而且增加交叉感染既機會。涮涮墨魚片嚥韌的，灼灼墨魚鬚爽脆的，味道平淡沒什麼驚喜，其實本來就可以生食，所以輕煮便可，但因為冰鎮的原故，要煮耐一點才夠熱呢。吊桶仔，還以為原條鮮魷火箭桶，劏掉就另一回事，鮮味已經流失殆盡，無特別淡淡的，變成沙嗲魷魚還可以。烏魚魚扣，即烏頭魚個胃，估唔到連罕見食材都有供應，每條魚得一個胃，依度有幾十條魚喇！喜歡的就叫鮮，不喜歡的就叫腥。帶著魚鮮味，清甜鮮魚味，爽爽似雞腎鴨腎感覺。魚腸，我都係第一次見真身，四大舊魚脂肪黏著魚腸魚肝，叔叔疑惑地問點解早早叫定？當時未能明白個中意思，當烚完後我終於知道喇﹗每舊魚脂溶掉有一碗油之多，期後所有肉都有魚腥味，期後所有菜都立立令吸晒油，搞到大家要放棄清湯，只食沙嗲湯喇。識食一定魚膏魚腸魚肝整個齊齊食，除第一舊可以品嚐魚膏的油潤幼滑外，餘下三舊都烚過龍，魚脂溶掉沒有魚膏咯，滑嫩感沒有了﹗魚腸短短粉粉的，魚肝甘香美妙，大家不感興趣，全部歸我所有。炸魚皮，連骨魚皮堅食到停唔到口呢！不浸湯淨食香脆無比，彷似有陣陣五香味道，掉到沙嗲湯吸吸熱力與汁液，半腍半脆滑嘟嘟，微濕香甜更滋味！唔夠喉要叫多一碟送酒一流。羊肉卷，羶香鬆軟，拖著厚厚沙嗲汁格外提鮮！豬心，爽脆的質地，每口滲出豬肉甜味。鵝腸，估不到加工過的都可甜鮮甜得出奇！爽嫩甘香，沙嗲惹味，清湯醇美自然。狗肚魚，超濕嫩的魚肉，滾燙燙啜得興奮莫明，甜甜的魚汁滲透每顆味蕾。魚鰾，同樣喜歡的就鮮，不喜歡的就腥！爽甜鮮味突出，膠黏彈的魚肚包著，回味再回味。蟶子，洗得算乾淨，燙燙甩款即起品嚐！白雪雪滑中帶彈，甜味濃郁可口，清新無比。伊麵，原來細伊麵只有頂好大光麵一半份量，大光麵要兩隻碗隻才裝到，伊麵只需一隻已綽綽有餘。沙嗲星級牛肉伊麵，無敵吸汁爽彈麵質，拖著厚厚沙嗲汁夾著頂級靚牛肉，五星級的沙嗲牛麵！沙嗲羊肉伊麵，沙嗲汁已被羊肉污染，烚任何食材都有羊羶味，進化版羊肉汁沙嗲伊麵。蒟蒻烏冬，首次遇上原來真身是這樣子，完全不樂觀。果然不出所料，質地及味道都接受唔到，趙落無彈性索索聲，無麵粉香無麵粉甜，只有蒟蒻獨有的清淡，雖然健康但我吃不消。牛肉粒，明白雖然係邊皮位切出，不過油脂滿溢，烚到廿十成熟都非常嬌嫩，牛味幽香。黑豬肉，黑豬肉不是黑色？應該想表達黑豚肉。甜甜的甜味不羶不腥，嚥嚥韌韌微彈蠻不錯。柏葉心，不理解是那個倍位，爽爽沒有味道。鱔片，雖然未夠脆彈幸好極鮮甜，鱔脂略瘦，鮮皮滑滑，合格。黃鱔，賣相似蜥蜴皮乾爭爭，硬實不鮮不甜不嫩不喜歡。鮮魷，界花靚靚刀功出眾，十分爽脆而略咸。田雞，肉甜嫩嫩結實。見有活生生的田雞在場，估計新鮮劏製的。竹仔魚，貌似方魚 BB ？味道及質地跟大條方魚幾乎一模一樣，但更實更彈，魚鮮味魚腥味濃濃參半，啖啖肉滴滴汁。手打墨魚滑，腍劈劈麵粉味重，不鮮不甜不彈。唐生菜、西洋菜，全部優質甜甜甜。西洋菜強烈的菜甜味爽嫩脆身好好味，唐生菜基本的清淡菜味點豉油食無意見。雞子，雖然火雞子無論如何都有點腥味，但在沙嗲汁及辣椒豉油掩護下仍是美味！皮脆肉嫩，爆出滾燙肉汁，美妙絕倫。…查看更多
