張生記 (已結業)

我同家人都鐘意食中菜，覺得一家人圍住一齊有傾一講係最歡喜。張生記唔係一般酒樓食店，環境較高尚；檯與檯之間寬闊，大家唔會覺得督促或逼夾。杭州四小碟可自己揀選，我地揀左杭州燻魚；美味臘鴨舌；西湖桂花藕及靈隱寺素燒鵝。鴨舌帶有少少辣，怕辣就可能揀其他。我個人最鐘意係西湖桂花藕，蓮藕釀左糯米，煙煙靭靭，超好味！杭州名菜宋嫂魚羹，未食過既話會覺得似魚翅類既湯羹，但並非如此。宋嫂魚羹鮮嫩滑潤且帶有蟹肉滋味，根本同一般既湯羹無法相比。杭州魚丸同我地平時食開既四海潮州魚蛋。杭州魚丸入口帶有空氣感，就好似食緊雪糕/豆腐咁，入口即溶既感覺。西湖藕餅用上兩小薄蓮藕片夾著肉餅, 唔好被外表呃到，因為一d都唔肥膩，脆卜卜，好正。…查看更多

今日老豆生日所以帶佢食好野～呢間主打杭州菜比較少見，餐廳非常優雅，每張枱都有花瓶做裝飾，座位舒服又闊落，枱面有軟墊再鋪上枱布非常貼心舒服！店員做事非常有效率，不錯！頭盤：杭州燻魚賣相一流，望落去好似糖醋排骨咁，估唔到燻魚會有咁大塊，真係非常驚喜！厚厚既燻魚，外層帶少許焦脆，食落香甜惹味，第一口真係唔小心講左句：好好食啊！魚肉鮮嫩入味，外脆內軟，不得了，驚喜十足，惹味十足！必試！（燻魚帶骨，所以食既時候要小心）湯品：宋嫂魚羹材料非常豐富既湯羹，每一匙羹攪起都有料，質地黏稠唔會水汪汪咁，仲有胡椒粉可調味魚肉稍微煎香外皮再落羹，食落有口感，而且每口都有魚肉真係非常滿足，入面仲有肉絲、薑絲、蘿蔔絲、粉絲⋯⋯啖啖豐富既口感，調味剛好唔會淡又唔太咸，再加上少少胡椒粉更添風味！飲完個人會暖笠笠，冬天最岩飲！小菜：家鄉回鍋肉色彩豐富既菜式，大火爆炒火喉十足，非常惹味，味道軟濃送飯一流，入面除左回鍋肉仲有豆乾、筍片、京蔥、青紅椒⋯⋯全部都沾滿醬汁，辣辣地嘅味道非常開胃！小菜：杭三鮮用濃湯煮既杭三鮮賣相一流，材料唔止三樣，有海鮮、豆腐、肉丸、薑粒蛋白丸“？”、魚肚、金華火腿、雞肉、木耳、小棠菜⋯⋯應有盡有，最特別既係薑粒蛋白丸“？”我本身以為係魚蛋，但咬落去非常鬆軟，入面仲有薑粒，口感十分過癮！湯底濃香但唔會太咸，配埋材料一齊食非常正！小菜：杭州東坡肉配蝴蝶夾動L動L既東坡肉，一上枱店員就會幫手用較剪剪開，閃令令既表面睇得出骨膠原十足，夾起既時候仲非常動L既感覺，有啲似啫喱，咬第一啖真係比佢驚艷到，調味滿分，而且東坡肉入曬味，入面既油脂分布平均，入口即溶，不得了！咬左一啖試左原味後再用蝴蝶夾夾住黎食，原本已經切開咗即蝴蝶夾唔會太厚，口感彈牙軟熟，唔會好似饅頭咁硬，食落唔會乾，夾埋東坡肉食更加好味，沾多少少汁會更惹味！簡直係絕配！小菜：蟹肉粉絲煲份量十足即粉絲煲，入面既蟹肉份量都十分之多，睇得出係新鮮蟹再拆散，配埋蔥粒，賣相吸引粉絲濕潤又唔會太多水，彈牙既粉絲配上蟹肉，鮮味十足，一啖接一啖，加埋XO醬真係不得了既配搭，惹味又香口仲帶少少鮮味，正！甜品：酒釀丸子十分推薦既甜品，酒味香又唔會太重，帶上少許桂花既味道，丸子用咗黑芝麻做餡，皮薄彈牙，細細粒既丸子竟然包裹住咁多既黑芝麻餡，一咬落去就有非常濃郁既黑芝麻香味，食落唔太甜！各種配搭都十分出色，係我食過最好食既酒釀丸子！正！…查看更多

「我細細個就聽過張生記呢個名啊」我母親係杭州人，曾經跟母親返杭州食過張生記。不過當時年紀太細，連擺咗咩食物落口都唔記得，唯一記得嘅係母親對張生記讚不絕口。早前知道張生記來港開舖，於是同屋企人嚟左位於銅鑼灣既張生記。一開始上咗前菜－西湖桂花藕。做法係將糯米飯釀入連藕之中，屬於涷食既菜式。加上金箔作點綴盡顯氣派。龍井手剝野生河蝦仁賣相最簡單，不過味道勝於賣相，河蝦幾清新而且充滿水份，呢道菜夏天時候最適合不過。杭州東坡肉最邪惡，肥肉一入口就融化，酥而不膩，由於太好味嘅關係我哋叫咗兩份東坡肉。另外仲叫左蝴蝶夾包住東玻肉，又係另一番滋味。雖然龍蝦湯脆米泡湯係今餐最唔正宗，並非杭州菜，但我認為係張生記必食之選。脆米炸到粒粒分明，脆米浸喺龍蝦湯之後口感相當特別，濕潤嘅同時依然香脆，令人愛不釋手。湯底濃郁鮮甜，入面有大量龍蝦肉，真係一分錢一分貨。江南名菜點少得老鴨煲，據職員所講，老鴨養咗幾百日，肉質卻一啲都唔老同爛。湯底香濃順滑，亦滲透一陣鹹香。配料都好味，特別係荀乾，口感特別爽脆。最重要係滋陰補腎，咁先能夠成為一個好男人。要講今晚最喜愛菜式，我認為非杭州燻魚莫屬。杭州燻魚用魚腩製成，每條魚只可以做到兩碟，可謂幾珍貴。魚肉經過先炸後燻，香脆之外肉質嫩滑唔腥，加上酸酸甜甜嘅醬汁，特別惹味。杭椒目魚絲最古惑，碟上嘅青椒並非每一條都係辣。假如你咁幸運地食到一條辣既杭椒，嘗試克服佢目魚絲口感煙韌，配上醃菜令味道更豐富。剁椒蒸千島湖野生大魚尾價值$780，據聞千島湖水質非常優美。由於水中含有大量營養，所以出產嘅魚特別鮮味。食落果然如此，魚肉非常鮮甜，嫩滑多汁，加上剁椒非常開胃，剁椒幾辣但唔會搶走魚嘅鮮味。蝦爆鱔最香脆，冇諗過鱔都可以炸。加上甜甜地既芡汁後可謂錦上添花。甜品方面，我家人大部份叫咗杏仁茶，而我對酒釀丸子特別情有獨鍾。張生記既酒釀丸子更清香，丸子相當煙韌，酒味唔會太濃。今餐之後終於明白母親當日既讚不絕口，每一款菜式非常別緻，味道亦頂呱呱，可謂無可挑剔。…查看更多

杭州張生記响中國出名嘅食肆，之前張生記接受帝苑酒店帝苑軒邀請黎香港作短期營業獻藝，當時我無去試到。😢😢 機會總會黎臨，張生記又再重臨香江，今次於銅鑼灣開店，一收到消息，即刻同家人約好一齊去喇😁😁。香油馬蘭頭：一道清涼爽口嘅上海/杭州前菜，賣相好靚，好工整。它的美味來自於馬蘭嫩葉清脆的甜菜味加上豆乾屑軟嫩豆香味與混在其中的麻油香，一道必點嘅前菜。👍🏻👍🏻招牌老鴨煲：要講必食的招牌菜式，一定是為張生記省靚招牌的張生記招牌老鴨煲，據我所知杭州張生記曾試過一日內賣出六百多煲，成為一時佳話。🤔🤔 店員為我哋介紹，老鴨煲精選成年老鴨、筍乾、上等金華火腿等，用砂鍋文火煨燉四個小時以上。湯汁濃而不膩，亦唔會有鴨酥味，配上鴨肉同勁多嘅筍乾，依個招牌老鴨煲確係頂瓜瓜。👍🏻👍🏻西湖桂花藕：之前睇過雜誌，西湖桂花藕都係推介菜式。蓮藕片釀入咗糯米飯，再用桂花蜜煮成，入口甜而不膩，好好食😋😋。杭州東坡肉：除了老鴨煲，佢哋嘅東坡肉都十分精彩，一盅一方五花肉，香味撲鼻，肉皮燉得如漆似膠，配埋軟熟嘅夾包，再加埋啲汁，超正😻😻，食落完全唔覺得肥膩。在座屋企人平時飲食都盡量少食好似東坡肉依類型嘅食物，但依份東坡肉一上枱，轉頭就全部報銷。😅😅龍井手剝野生河蝦仁：「龍井蝦仁」是用河蝦及清香的龍井茶烹製而成的杭州名菜。張生記嘅龍井蝦仁，滲透住淡淡龍井清香，蝦仁食得出好新鮮嘅味道，既爽滑又彈牙。😌😌杭州燻魚：傳統燻魚涼菜，魚炸得連皮都脆卜卜，魚肉不腥不乾，香口惹味 🤤🤤。江南鹹雞：皮脆肉嫩，雞肉好滑好香。雖然唔稱得上係咩特別菜式，但我覺得張生記處理得好好。👍🏻👍🏻杭椒目魚絲：唔知係咪取其楷音，目魚其實係講緊墨魚🦑🦑。墨魚好鮮甜彈牙。依道菜最特別反而係杭椒，杭椒有啲辣，有啲又唔辣，好似玩緊抽獎遊戲。🤣🤣蝦肉小籠：佢唔係普通嘅小籠包，肉餡係豬肉同蝦肉混合。小籠包餡韌湯甜，口感爽脆，鮮味十足。😊😊酒釀丸子：張生記嘅酒釀丸子真係值得一食。一啖入口，即刻品嘗到張生記用上了靚嘅酒醩，酒香味同過往食過嘅酒釀丸子有過之而無不及，張生記係我食過最香酒味嘅酒釀丸子。😍😍 除咗酒香之外，甜湯仲滲出淡淡嘅桂花香。另外，張生記用嘅丸子，唔係普普通通無餡嘅糯米粉粒，而係實實在在，有餡嘅迷你湯丸仔。湯丸仔皮好煙韌，餡料我就食到黑芝麻同花生兩種。😋😋後記：張生記店員服務態度好好，好周到。店內環境都好清靜優雅。而佢哋自家製嘅XO醬都好香，又好夠辣味。茶方面，張生記都有唔少選擇，我哋就揀咗西湖龍井同桐鄉胎菊皇。其實仲有一道菜無為大家介紹，因為我唔記得叫咩名喇。😅😅雖然係好普普通通嘅腐皮炒菜，但張生記都煮得好好食。😄😄…查看更多

今日嚟到銅鑼灣，約咗一班舊同學食飯，今次就揀咗依間張生記黎食飯。餐廳嘅環境幾別緻，睇得出老闆對餐廳係有要求的。先黎既有西湖桂花藕，些此菜本為凍既，但係餐廳將佢加以改良，改成暖既，令到桂花藕更冧更香。桂花藕入面釀左糯米，糯米令到整道菜更有口感更有層次。整體而言，呢道菜帶微甜，作為暖胃菜絕對一流。香油馬蘭頭則是第二道前菜。餐廳採用左野生馬蘭頭，再加上麻油，令到入口先帶麻香，之後再品嚐出馬蘭頭既甘甜。杭州燻魚使用左鯇魚腩黎製作，醬汁帶酸甜，外皮香脆，魚肉滑得黎帶口感，呢道杭州燻魚被完美演繹出來。湯水方面我地就叫左個張生記老鴨煲(半份)。餐廳職員同我地介紹依道菜嘅時候，提及過呢隻鴨已經養咗五百幾日，骨頭比我哋正常食到嘅鴨硬，而且滋陰補身，營養價值十足。秘製雙拼則是墨魚腸拼魚片。墨魚腸呈墨汁色，食落都幾有墨魚味。魚片則有別於一般既魚片，呢個魚片相對冇咁爽，口感上反而有啲似墨魚丸，個人非常喜歡。另外餐廳奉上咗米醋比我地點黎食，豐富左味道上嘅層次。剁椒蒸千島湖野生大魚尾可以話係其中一個最出色嘅菜式。餐廳透露呢條魚必須喺20度嘅水溫生長七年先可以達到此大小。呢條魚尾含豐富嘅膠原蛋白同埋氨基酸，食落魚肉好滑好有魚味，剁椒雖然香辣搶味，但就冇喧賓奪主！龍井手剝野生河蝦仁就採用左杭州淡水蝦，味道清甜，口感爽，非常不錯。杭州東坡肉則用左新鮮豬肉黎製作，餐廳表示佢地既東坡肉羶而不膩，夾住蝴蝶夾黎食更增加左口感上嘅層次，既冇肥膩嘅感覺，肉味又更突出。杭椒目魚絲既辣椒有辣有唔辣，食每一隻都好刺激，好似抽獎咁樣。炒既時候餐廳加左鹹酸菜，又名倒督菜，為菜式增加左不少風味。蝦爆鱔炸得十分鬆脆，鱔肉肉質有口感，有魚香，而且份量好大。最後龍蝦湯脆米泡飯作為成餐飯既結尾非常圓滿。龍蝦湯十分濃郁，再配上芝麻同埋葱粒，然後再加上脆米，無論口感同味道都層次十分豐富。總括而言，今餐非常之豐富，環境亦都舒適，服務更是一流，絕對值得大家一試！…查看更多

近期完全提不起勁外出用膳，亦有個多月沒有執筆。不過朋友一年一度的生日聚會，總得需要賞面出席。飯局地點選址銅鑼灣新開張的張生記。在香港要吃浙江杭州菜，店子不多，最出名最老字號的首選尖沙咀的天香樓。數年前肯恩曾經光顧，食物委實不錯，不過始終有點老牌子的氣燄，服務水準不過不失。另外在灣仔的浙江軒，未獲米芝蓮青睞之前也曾嚐過，食物水準也很令人滿意。張生記，來頭其實不小，亦不是初到貴境的新手。對於居住於銅鑼灣及黄埔的老街坊，對張生記應該不會太陌生。張生記自1988年於杭州創店，2002-2006期間曾經在香港的銅鑼灣及黄埔開了國外分店。可惜當其時的香港正席經過沙士的蹂躪，經濟低迷。時不與我，張生記開業不到數年香港分店便先後結業。經歷十多年的變遷，張生記已經在國內站穩陣腳，在杭州、上海先後已開了超過十間分店，今年亦決定在捲土重來，在香港銅鑼灣重新開業。食店位於銅鑼灣利園後面的新寧道，屬旺中帶靜的區域。飯局當日，食店會先發送WhatsApp短訊，提供當晚飯局廂房的編號及名稱給訂位的客人，服務算是週到。食店堂座用餐區不算很大，只放上八張圓枱及五個卡座位，裝修雅緻樸實。堂座區座位不多，相比之下，食店似乎更看重貴賓廂房的宴客服務。食店一共設有九間廂房，每而廂房都可舉行十人以上的飯局。適逢八月份仍是食店新開張期間，訂座廂房不設最低消費的限制，雖然只有五人飯局，食店亦在肯恩要求下安排了一間廂房給肯恩舉行生日壽宴，更能暢所欲言。每間房間都起了一個獨特的名稱。我們這間廂房名為「平湖秋月」，饒有詩意。入座尚未點菜，店員先送來餐前小吃，分別有元貝XO醬、香脆花生及車厘茄各一碟。食店茗茶每位$22，小吃則另外收取$68，價錢算是合理。浙江菜著重清鮮煮法聞名，大多數菜式都以少油少盬烹煮，所以較為健康。菜式款式不算很多，主菜大多以海鮮類為主，價格定位是高級中菜館規格無疑。點了數款菜式，當中包括食店的鎮店名菜老鴨煲。意外地，這道鎮店名菜，竟然被安排成為晚餐的第一道上桌菜。 張生記老鴨煲 這道菜式每位散點的話可要$180一客，肯恩五人飯局若果每人點一客老鴨煲便已經消費了$900。既然如此，點選整煲6-8人份量的老鴨煲還更划算。老鴨煲是張生記開發出來的名菜，以老鴨，火朣及笋乾慢火炆煮製成。湯品用料充足，烹出的鴨湯味道濃厚香醇。由於鴨肉是較寒涼的食物，所以湯品亦有生津滋陰之郊，是極為適合夏天享用的菜式。老鴨煲以一大砂煲上桌。砂煲連湯重量甚巨，相信一定需要男侍者才有足夠力氣把它端到席上。一客6-8人份量的鴨煲，五人大概可以喝到四碗的鴨湯，砂煲的保温能力甚強，邊談邊喝了一陣子之後砂煲裡的鴨湯仍然甚為温熱。我們大顆兒先喝過兩碗湯後其他菜才開始上桌，之後飯局下半場着侍者把湯拿回厨房重新煮熱再上桌，房間整夜也彌漫着裊裊的鴨湯香氣。西湖桂花藕 爽脆蓮藕片內填充着軟糯糯米，以冰糖桂花煮製後吸收桂花甜香，甚富地方色彩的精緻小點。杭州燻魚 燻魚以醬汁醃製後稍稍輕炸增加惹味感。每件燻魚大小統一，魚肉雖然較厚，但整片魚塊煮得非常入味無腥，魚肉夾雜酸甜醋香，惹味可口。黑松露手剝野生河蝦仁 選取了野生的河蝦，價錢自然較貴。所謂一分錢一分貨，野生河蝦肉身厚實彈牙，蝦肉鮮味突出，並沒有被味道濃郁的黑松露掩蓋，鮮味在松露的加持下更能提昇，啖啖肉的滋味令人回味再度。杭州東坡肉 東坡肉以每位計算。原先打算每人點選一客東坡肉，不過得到侍者提醒，每人一份東坡肉份量會太多，所以我們最後五個人只點了兩客東坡肉，再另加兩份蝴蝶餅伴吃。上桌每份東坡肉一分為四，由於每份東坡肉只跟兩塊蝴蝶餅份量有點不夠，我們再另外加了兩份蝴蝶餅。杭州菜以清淡鮮聞名，東坡肉卻而深厚的脂肪及香濃的味道而成為杭州第一名菜，實在始料不及。五花肉以那層豐腴的肥膏最為令人津津樂道，脂香撲鼻，入口即化，令人吃不噤口。底下較瘦的部份亦炆得軟腍入味，吸滿煮汁的精華。捨得近年興起了一個叫斷捨離的生活方式，大概就是把無用的東西丟掉，過知足簡約的生活。這道叫捨得的青菜，取用的是小棠菜幼苗不特止，還要把小堂菜較青澀的菜葉部份拿掉，只保留僅有拇指頭大小的菜心部份，口感細嫩帶爽。肯恩聽說過有些朋友因擔心農料問題，在家炒菜心時也會把菜葉部份拿掉，只吃菜莖部位。這道菜式雖然亦會把大部份菜葉拿掉，但為的卻是更佳的口感，所謂的"捨得"，其實是指客人願意花費吃好東西吧！！魚麵筋豆麵 以花膠及魚麵筋入饌，連麵食本身都是用綠豆做成的豆麵，口感滑溜之餘蛋白質亦很豐富，是坊間較少見的一道麵食，值得一試。食店小菜確實做得甚具水準，環境亦很不錯，不過服務方面肯恩稍嫌未能跟得上香港高級中菜館的水平。不是說服務員態度不好，只是當服務員建議把我們的生日蛋糕在房外面切好過後才拿上桌，實在令大家無言以對。食員在侍餐上的禮節，還是需要有點改進才能與香港接軌。食店菜式定價偏高，不過由於新開張的關係，肯恩八月光顧的時候會有88折的優惠。(後來收到食店短訊，九月份晚市仍然有9折的優惠)經歷了超過三個月的政治風波，香港走進前所未有的谷底。踏入九月份，一切尚未平息 ，肯恩亦未感覺政府能夠把握釜底抽薪的契機。『止暴制亂』，只是政府官員掛在口邊的空洞口號。經歷沙士後的蕭條，張生記在十數年後的今天捲土重來，卻又剛好撞上香港持續的抗爭運動，真是有點生不逢時。希望一切能早點完結，令香港這個美食之都，能早日回復昔日的生態平衡。…查看更多

我爸爸好鐘意睇美食專欄，好多時都跟住去搵食，最近佢睇完李純恩介紹張生記，就話要去食；咁岩婆婆生日，我地就Book左張生記一齊食飯！大家都對張生記非常滿意，地點位於銅鑼灣新寧道，交通方便至極；環境方面無得輸，寧靜舒適，唔會吵吵鬧鬧，可以離開煩囂；至於食物更係絕頂好味！前菜小碟點左兩款：杭州燻魚及西湖桂花藕，真係超級好味！燻魚好多地方食得到，張生記既燻魚食過番唔到轉頭，呢d先係燻魚！另一款前菜小碟西湖桂花藕連我麻麻地蓮藕都大讚，中間釀左糯米，咬落去既口感一流！老友記都係鐘意肥膩重口味既食物，杭州東坡肉又係難以忘懷！一盅入便有一大舊，已預先輕輕切開，我覺得咸左少少，而阿婆就好鐘意，半肥瘦，大讚入味又夠淋！蝦爆鱔既重點不在蝦，完全食唔出係鱔，超正！而且唔厚粉一d都唔油膩，食到lam lam 脷！婆婆話始終要有d粉麵到肚，但我地又唔想咁普通叫蛋白炒飯或伊麵⋯睇完個menu最後點左魚麵筋豆麵！配菜有花膠架，味道夠麵又彈牙，一家大細都岩食！甜點方面我地要左菊花糕。起初仲以為上錯左，以為係杞子糕，食落口先後充滿菊花味道，清甜舒爽，為今晚畫上完美句號。…查看更多