家全七福 (粵海華美灣際酒店)

舊同學由外地返嚟飯聚，同學提議試吓一間高級傳統粵菜食府「家全七福」，連續兩年獲得米芝蓮推介。餐廳位於酒店三樓，中菜廳格局，樓底高，牆上有中國畫裝飾，我哋一行八人，安排坐大圓枱，座位寬敞，都見到大部份係遊客嚟幫襯。乳豬需預先落訂，另留起叉燒及炸子雞。◈ 大紅片皮乳豬全體 $2000餐廳招牌菜式，需預先落訂，以前去飲宴都經常食到乳豬全體，近年比較少遇到。乳豬以炭火烤製，第一食先食脆皮，外皮烤得酥脆，油香四溢，刀工了得，皮下保留薄薄一層脂肪，配上甜麵醬、酸菜，大蔥絲，千層餅夾住食，感覺會吸減啲油，減低肥膩感。享用完脆皮部份，店員會攞返入廚房，隨後會上第二食乳豬斬件同豬骨，肉質嫩滑，唔太瘦亦唔肥膩，無多餘肥膏，調味剛好，唔會過鹹。◈ 蜜汁叉燒 (例) $420米芝蓮推介必食叉燒，肥瘦比例各佔一半，所謂嘅半肥瘦，切得有厚度，肉質軟腍鬆化，肥嘅位置有咬口，蜜汁清甜又唔會蓋過叉燒原味道，最緊要燒烤完，肉汁依然被鎖住夠晒juice。◈ 當紅炸子雞 (1隻) $600唔算好大隻，外表炸得金黃油亮，皮真係炸得非常脆，入口嚓嚓聲裂開，雞肉緊致嫩滑，有肉汁，鮮雞味濃，一啲都唔肥。◈ 欖菜乾煸四季豆 $200唔係咩名貴食材，但乾煸得夠晒火喉，四季豆表面皺皺的，口感焦香乾脆，唔會過諗，加埋欖菜嘅鹹鮮，增加風味。◈ 魚香茄子炆伊麵 $450上枱已經陣陣鹹魚香，茄子棉滑索汁，加埋肉碎爆得好香，餡料多，伊麵有彈性，唔會過諗，炆得入味，唔肥膩，隻碟唔會有多餘嘅油滰住，大廚煮得出色，全晚我最鍾意。◈ 生炒牛肉飯 $420有云要知道廚師真功夫，就應該要試炒飯，平凡嘅炒飯要炒得好食並唔簡單。牛肉鬆軟鹹香，加埋雞蛋蔥花簡直絕配，時間同火喉控制得好好，生菜絲微軟依然保持爽口，飯炒得粒粒分明，係每粒飯都會被蛋包住嘅黃金炒飯，盡顯廚師功架。◈ 菠蘿咕嚕肉 $420夠鑊氣，糖醋汁酸甜度足夠，但豬肉係切薄片，炸得乾咗啲，我哋都有食淨。◈ 蛋白杏仁茶 (位) $80杏仁味好香濃，一絲絲蛋白夠滑夠多，融入杏仁漿口感幼滑細膩。◈ 生磨合桃露 (位) $80有點失望，浠咗啲，唔夠濃郁。粵菜嚟講算貴價，當然會有更高期望，菜式有出色嘅，亦有點失望位。埋單$5758，當我哋離開嘅時候，先發現門口貼有張海報，用匯豐咭埋單可享九折，可惜發現得太遲，埋單時店員亦無提及，食客去幫襯就可以留意下。#家全七福地址：灣仔駱克道57-73號粵海華美灣際酒店3樓…查看更多

「家全七福」當年戴着「福臨門」人馬的帽子開業，亦成功帶來了「福臨門」的客人，我唔知道咁講啱唔啱？似乎老一輩的富豪繼續依戀舊飯堂，但他們的下一代對嘗新更嚮往。芳齡60歲的好友，富豪第二代說得上，生辰壽日在此大邀親朋，父母在堂、兒孫相伴、亦有我們一眾飲食朋友到賀，她說只為高興，見到她面上的笑容展露無遺，我們出席總算有貢獻！「家全七福」的菜式與「福臨門」同出一轍，大菜是強項，體面的宴客菜單，共18道菜式，鮑翅燕窩自然不缺！ 椒鹽田雞腿、脆皮糯米雞翼、椒鹽一字骨、茘茸鳳尾蝦、金錢雞五款前菜一起上，霎時間感到有點大堆頭，而且主要是惹味酥炸物。說實話我不太喜歡這樣做，久放了的酥炸物始終有點失色，匆匆忙忙的吃，味覺反應會不會有點來不及？而且絕無擺盤的美感，與潮流的藝術美食南轅北轍。味道方面沒有出錯，雖然未能留下什麼特別印象，這些炸物作為前菜有點膩，以作佐酒卻又適合，話說過來，今晚有無盡的香檳、紅白酒、威士忌及XO待著。大紅片皮乳豬全體招牌乳豬水準穩定，沒有一次令我失望，皮脆肉嫩，非常香惹，除了片皮之外，連骨的肉及豬腳仔亦會斬件上，這才是我的至愛，唔客氣啦，我吃了一只豬腳仔。豬肚鳯吞官燕今晚我最欣賞的菜式，就是這道豬肚鳯吞官燕，巧手功夫矜貴菜，賣相體面特色，坊間少人懂得做。潮州菜有鴨吞翅，粵菜師傅來個變奏，鴨變成雞、魚翅變成燕窩。做法是把矜貴的官燕釀滿起骨小雞的肚子內，然後以豬肚包着雞，放在高湯內煮，以「隔山打牛」的方法得到慢煮效果。堂前剖開豬肚及雞、露出養顏的官燕，繼而小心地把晶瑩透亮的官燕盛載於金黃湯色中，條條剔透浮載於湯中的精緻感，盤飾簡單，畫面卻呈現相當悅目。手法嚴謹、賣相雅致，很有名門大家的氣質！食味方面，有了豬肚包在外層，豬肚和雞肉的鮮甜同時融入上湯中，加上啖啖官燕，三種精華交融，腴美絕倫。四、五千元一客的豬肚鳯吞官燕，這一碗也許值$400。吸了湯味的豬肚，切片後蘸豉油食，也是一大美味！蟹黃鴛鴦石榴球兩個石榴球，一粒內藏蟹黃，另一粒同時釀入魚翅，一次過解決吃翅與不吃翅的問題。紮實的石榴球，皮薄飽滿，光滑汁豐，味道清甜，粒粒蔬菜口感，特出了蟹黃的腴香而魚翅的口感。蠔皇原隻30頭吉品鮑坊間一棵30頭吉品鮑賣$600多，慷慨的主人家，今晚我們每人有兩棵，真是吃鮑魚都可以吃飽。柔軟稔滑，色澤亮麗，香味濃郁，餵飽湯汁的吉品鮑不可能失分；只嫌蠔油味蓋過了高湯之味，相比近年的經驗，只論鮑魚汁、我認為不及阿翁的好。清蒸黃皮老虎斑魚靚蒸調有功架，非常稱職。魚頭更是滑滑，歸我所有。七福脆皮雞另一道水準穩定的鎮店名菜，雞皮脆如薄紙，肉嫩香滑。長壽伊面及瑤柱荷葉飯皆有水準，尤其是荷葉飯更是響噹噹的必食之選。 合桃酥餅、鴛鴦棗茸糕、懷舊芝麻卷、鮮奶椰汁糕、鴛鴦壽桃包 去到甜點，大家已經太飽，只好打包，我對甜品亦冇特別意見。「家全七福」不失為富豪飯堂，有廚藝，選材上升，性價比合理。…查看更多

所謂「天上雷公，地下舅公」，舅公喺屋企人心目中o既崇高地位可真無人能敵。長輩深知舅公最愛食鮑魚同魚翅，上週五宴席就專誠揀咗一家以鮑參翅肚聞名o既「家全七福」舉行。剛剛喬遷往新址o既「家全七福」仍然留喺灣仔區，不過就升級成為酒店中菜廳。餐廳佔用全層面積，接待處先以鎮店靚翅及魚缸裝飾。走廊及牆身簡單掛上國畫，自然地流露出中國文化o既色彩。大堂設有多張圓枱散座，光鮮企理，雖則右手邊樓底明顯比左邊高，但由於枱於枱間空間好足，人多時聲浪都唔會好大，配埋厚墊椅櫈，坐落極之舒適自在。「家全七福」屬名人飯堂之一，當然係唔少得私人廂房，間間同樣寬敞，大方得體。房內長期有兩位服務生為客人斟添酒水、分餸換碟，溫婉落力，很是周到。餐桌上每位客人面前都放有一份菜譜，餐單上可見晚宴合共十三道菜，主人家當真盛設非常！皮蛋醬蘿蔔：為晚餐打響頭炮o既皮蛋隻隻流心又溏心，色澤亮麗，且香濃美味；配角醬蘿蔔不但巧妙地砌到成朵花咁靚，片片花瓣都一樣咁爽脆惹味，同個皮蛋真係好相襯。食完咁開胃o既前菜，乳豬亦啱啱燒好。大紅片皮乳豬全體：乳豬皮一啲肥膏都冇，咬落輕巧薄脆，鬆化無比，夾上麵包後再輕輕點上甜醬已夠可口。正當大家細嚐緊乳豬o既手撕二度時，經理姐姐就推出兩煲靚湯。清澈o既湯底看似平平無奇，但其實湯內兩隻疑似大水蛋o既物體原來暗藏玄機。經理姐姐手起刀落，邊切邊講解巨蛋最外層為豬肚，豬肚下藏著一隻雞，而雞內則載滿鮑翅。此道古法翅品o既三重包裝需時又考功夫，雞骨湯底亦要肴燉上六個鐘頭，真係少啲心機都唔得呀！靚靚媽咪好多時炒餸都會贊一贊酒，據悉原來食翅前混入一、兩滴拔蘭地，其效果都可以好似贊酒般為翅品再度提升。主人家出名識食，故亦一早預備好幾壺拔蘭地好等客人自行贊入湯內。豬肚鳳吞大鮑翅：粗粗o既鮑翅滑溜脆身，贊過酒o既雞湯亦芬芳濃郁，白雪雪o既豬肚更加係爽滑過人，精彩尤甚！蠔皇30頭吉品鮑伴鮮腐件鵝掌芥蘭：「七福」名菜30頭吉品鮑香潤溏心，大大隻鵝掌腍滑又軟熟，芥蘭亦翠綠清脆，就連伴上o既鮮腐件都入哂味，實在完美。蟹肉韭菜盒：記得之前食韭菜盒都總係喺潮州酒家度食，一人一件都幾溜吓。意外地，「七福」個蟹肉韭菜盒皮薄香脆得黎食落一啲都唔油膩，個蟹肉韭菜餡料清香嫩甜，比起潮州菜館個版本健康得多。煎素腐皮卷：可能蟹肉韭菜盒煮得特別出色，喺有比較o既情況下，個素腐皮卷就變得齋咗少少。雞子戈炸：與長輩食飯不時都會聽到好多故仔，當晚其中一個就講及此味雞子戈炸o既來由。據說，「雞子」乃北方人o既雞蛋，即雞之子也，而並非廣東人所理解o既雞睪丸，而「戈渣」則為「鍋炸」，合併埋o既「雞子戈渣」其實即係「炸雞蛋」。後因對「雞子」有所誤解，好多廚師都開始加入雞睪丸去烹煮菜式，所以就演變成「炸雞蛋」同「炸雞睪丸」兩款「雞子戈渣」。「七福」版雞子戈炸皮層薄而乾巧，毫不油膩，個雞蛋心好似白雲般輕柔軟潤，超！（由於在場o既女士們都唔想查明所吃下o既「雞子戈炸」究竟係南北邊派o既「雞子」，小肥就冇再追問所用o既食材。）銀牙蟹肉炒桂花蝦絲：遠睇桂花蝦絲金黃色o既外表真係好似炒桂花翅，因用上o既材料好相近。雪白o既蟹肉鮮甜幼嫩，幼幼o既蝦絲同牙菜則又爽又脆，桂花蝦絲熱辣又乾身，炒得好夠鑊氣。蜜味玫瑰雞：怕骨o既XO仔食雞只會揀雞胸同雞皮黎食，兩者之健康對比可真能比喻成天使與惡魔。健美o既雞胸厚身無肥，好多時都會被煮得又嚡又乾，幸好師傅掌握火候恰到好處，此道玫瑰雞o既雞胸白滑嫩口，極為細膩。雞皮乃雞隻最油滑及最味濃之部位，所以個人覺得食雞唔食皮比起淨食雞皮更為罪過，每次例必搜集各方準備棄掉之雞皮，然後慢慢品嚐。溢滿蜜糖香及玫瑰露o既雞皮芳香甘醇，油潤光滑，當真絕無欺場！苦瓜豆卜炆斑尾翅：仍停留喺初級食魚班o既小肥雖則只係細嚐咗兩口，但都食得出苦瓜甘香，斑尾斑翅魚肉新鮮嫩滑，魚皮好夠軟腍，實屬好魚也:)！上湯煎粉粿：中國人食飯總愛以飯麵作單尾，但因賓客大多都要遠離澱粉質，主人家就特意改選懷舊o既上湯煎粉粿。每人被分派清澈而濃郁o既上湯一碗，輕輕將煎粉粿滲過上湯，粉粿外皮化於口中，餡料爽厚得黎半帶鬆脆，咸中帶甜，美味非常。酥皮蛋撻仔：新鮮焗製o既蛋撻仔微甜香滑，層酥皮又唔會過份油膩，一口一隻極為輕盈。千層糕：熱辣辣、香噴噴o既千層糕糕身鬆軟，姨媽們大讚健康唔溜滯，細佬卻略嫌咸蛋黃o既份量唔夠多。「家全七福」新店無論係位置、環境、服務、衛生、食物質素都升達酒店級水平。長輩於樓底高高o既大廂房內宴席一圍，並為主賓舅公舅婆特訂多款懷舊功夫菜，小肥有份參與其中深感榮幸之際，更覺視野開闊不少。宴會上o既佳餚更有一系列o既美酒襯托，果真極其美滿！…查看更多