大井町日式放題 (已結業)

年三十晚啦！辛勞的一年，對自己和家人好D，就來一餐放題以滿足大家的肚子。''大井町"，之前我哋已經食過2次，覺得食物質素和服務都不錯，所以今晚揀了此店來慶祝年三十晚。食物未到前梗係攞少少冷盤食住先，青口、螺和螺肉都0K。刺身好快到。有三文魚、中拖羅、北寄貝、甜蝦、馬刀貝、油甘魚、赤蝦、赤貝、鮑片、榮螺片，刺身都幾厚切，幾鮮味，蝦亦幾鮮甜。 火炙壽司:火炙味噌醬蟹棒、汁燒和牛壽司、火炙三文魚腩、火炙芝士玻璃蝦、火炙左口魚邊，好味。壽司:辣汁針魚壽司、松葉蟹腳壽司拌蟹面豉、花之戀、三文魚壽司、帶子壽司、虎蝦壽司、胡椒柚子醬拌中拖羅，壽司也不錯，我就比較喜歡食火炙壽司多D。手卷:海膽和辣味鳗魚手卷，不錯。:)卷物:牛油果軟殼蟹卷和辣汁炸蝦卷，不錯。:) 鐵板料理:鐵板牛柳粒過熟有D靭及鞋、泡菜炒豚肉微辣中帶甜味，味道就一般啦！:)創作料理:吞拿魚他他一般、章紅魚薄切拌柚子酢不錯，味帶鹹鹹地酸酸地挺開胃、水晶香芒大蝦卷都0K，我覺得款式似泰、越式食品。 創作壽司:以"大"(右一)、"井"(右二)、''町''(右三)命名的三款壽司，都算略有心思的，但“大”和“町”都以蝦作食材，有重複感，其中一款應以其他食材就較好啦，味道以“町”這款較惹味及有層次，蝦上面舖上生蒜粒、介茉及辣椒醬，食落有三種唔同的辣味，口感不錯。:)天婦羅:虎蝦天婦羅、一口番薯天婦羅、南瓜天婦羅、秋葵天婦羅、冬菇天婦羅，熱辣辣，好味。鐵板料理:鐵板牛油帶子，肉質彈牙唔韌，肉汁豐富，好味。燒物:千島蝦多士0K:)炸物:榴槤炸彈、紫心香芋丸、炸紫薯餅、墨魚槳餅、塩酥杏包菇，日式炸餃子，炸物。一品料理:地獄辣蜆，好味。燒物:塩燒雞翼，都0K。:)燒物:燒菠蘿、牛舌，燒物。焗物:焗蠔北海燒、焗迷你蟹蓋，味道一般。:)燒物:台灣一口腸味道一般、醬汁雞肉串都0K、塩燒鯖魚好味、塩燒雞翼都0K、塩燒海蝦有D乾。:)一品料理:地獄辣蜆好味(encore)、日式雞絲翅煲0K、海螺片炒蒜芯比較鹹。:)一品料理:壽喜牛肉鍋，好味。焗物:木瓜蒸蛋白、日式蒸蛋，兩款味道一般，略嫌唔夠滑。甜品:款式都幾多，味道不錯，食左好多。甜品最正當然係 movenpick 雪糕，每人只可要一杯，家人唔食比埋我，所以我食左兩杯。總結:=====今晚很滿足啊！十分滿分，我比八分。今天再來"大井町''，無論食物和服務質素仍然保持水準，特別是這些大時大節！店內環境寬敞，光亮舒服，侍應勤快有禮，食物冇漏單及也上得快，以今時今日的食肆服務要求算是唔錯了，值得一試，我哋會再來的。…查看更多

今天是阿姨的生日，所以今年和他吃日式放題慶生。訂了七點半的枱，但是還需要等大約10分鐘。食物種類頗多，刺身、壽司、創作壽司、軍艦、麵飯、蒸煮、一品料理、燒物、天婦羅等等，我們五人每樣都叫了少許。刺身很新鮮，吞拿魚是非一般的吞拿魚，是中拖羅啊，甜蝦大大隻，而且這裏有赤貝吃。對於日式放題來說，成本不低啊。壽司很新鮮，細細件，可以多叫幾款來試。我們其實叫了很多食物，但是由於上菜比較快，所以都影不切。這間日式放題的性價比極高， ＄268再+10%服務費，都不算很貴，我會再來的。…查看更多

約左個朋友食放題，等埋佢放工，我地8點45分先上到去，好彩都有位，唔洗點等！近門口有個自助bar..有生果，有前菜，中華沙律，豆腐，枝豆，仲有甜品，同飲品，飲品都好多選擇，仲有酒類，好幾隻牌子揀！比起其他既放題，呢到真係好多選擇一坐低緊係第一時間寫刺身～刺身好新鮮，特別係帶子，好鮮甜，油甘魚一d腥味都無，甜蝦好新鮮～好味呢到上菜都算快，亦都無溜單，不過今次食得唔多，可能晏就食得飽得滯，叫左幾樣野就好快飽呢間d野食都好好味，會再黎幫襯…查看更多

今日準時放工，心情輕鬆，又與同事繼續發掘下公司附近的美食兼吹水聖地。最後揀左大家喜歡的日式放題~刺身拼盤，自由配搭，瘋狂點了多件我喜歡的甜蝦/三文魚/帆立貝，入口鮮味無比! 除了刺身吸引，想不到連配角玉子也很香甜~多款壽司，白飯軟硬適中，款款味道濃郁，其中最愛和牛壽司，牛肉味濃，肉質細緻，滲出點點油香，加上洋蔥提昇鮮味，令人食指大動!吞拿魚他他沙律，嚐到吞拿魚刺身的鹹鮮味，加上天婦羅碎/蔥花/千島醬調味，口感豐富，甚具日式風味 ~芝士年糕，金黃的外皮薄而香脆，內層香滑流心的芝士，與軟綿煙靭的年糕互相融合，芝味不太濃烈易入口， 味道襯絕，必點!飲品種類繁多，有十款以上揀，連維他奶暖櫃都有，非常貼心~ 甜品，兩款牌子屬高檔，質感柔滑細緻，份外香甜味美~整體質素甚佳，滋味十足，尤其以高質牌子雪糕作結，令我們大感滿足!…查看更多

早排同舊同事食飯，知道師姐下年初計劃去韓國濟州，但未定跟團定自由行，話晒小弟2012年都去過一轉，手頭上都有唔少資料、地圖及單張，所以，約咗今晚食飯聚一聚兼交收。佢話耐無食放題，投其所好，就食番餐放題，有時啲嘢就咁「橋」，一喺就成年無食放題，一食時隔兩個月又食一次。雖然大井町位處荃灣食廈大鴻輝，好怕嚟呢度因為等電梯煩，不過，餐廳晌商場層，並非大廈層，所以搭扶手電梯上去就可以。餐廳佔商廈全層，地方非常之大，而且，最鍾意喺間隔成唔同大細嘅卡位，卡位嘅隔板又專登整高啲，變相有個私人空間:)，唔會受隔離枱咁多騷擾。一入門口轉個彎，有個自助區，食開日式放題嘅朋友都知，主要會喺飲品、甜品自由取用專區。由於選擇多，都唔可以唔介紹一下。飲品3組大雪櫃，韓國、本土嘅樽裝、罐裝及紙包飲品，款式多達近廿款。不過，今次心水之選唔太多，所以，隨意揀幾罐飲吓。果汁、熱茶想健康少少，另一邊位嘅果汁、熱茶可能啱你，不過，朋友試過啲果汁，話麻麻哋，因為味道偏甜。沙律、生果自由區除咗飲品，仲會搵到沙律同生果，雖然規模細，但總提供多個選擇俾有需要嘅客人。此外，酸薑、八爪魚仔亦晌度搵到。自助專區嘅甜品就唔介紹住，等臨尾先一次過講。翻轉頭介紹放題有咩嘢食，一如時下好多放題店，兩大本「檔案冊」放滿分門別類嘅點菜紙，類別包括：前菜、刺身、壽司、卷物、軍艦、手卷、炸物、燒物、天婦羅、蒸焗菜式、鐵板料理、一品料理、湯麵，數一數，足足近百款美食。順帶一提，牆邊貼上wifi密碼，方便客人使用。建議有提供免費wifi嘅餐廳，密碼就倒不如好似大井町咁大方啲貼晌當眼處，唔使吓吓煩到啲店員問密碼。此外，招呼唔錯，喺收銀態度有啲麻麻，上菜快，而且今晚仲無漏過單添，難得難得！前菜一口氣揀咗4款前菜濕吓口：中華沙律、帶子裙邊、魚翅海蜇、冰頭漬（三文魚頭軟骨），除中華沙律，其他幾款都頗有特色，平常都少見，最鍾意喺帶子裙邊，幾有食螺肉嘅感覺，煙煙韌韌，三文魚頭軟骨口感爽爽脆脆。刺身刺身都有幾多選擇，一共有14款，又見到玉子刺身，之前都寫過，稱得刺身，即喺魚生，有啲刺身已用牛肉、馬肉，但玉子，即喺雞蛋，不過，玉子刺身唔會俾隻生蛋過你，哈哈。我哋精選揀咗當中6款：三文魚、吞拿魚、北寄貝、帶子、甜蝦、赤蝦，砌成一大盆份外好睇，各款刺身睇落光澤新鮮，三文好夠油潤，北寄貝入口爽甜，帶子口感清爽，甜蝦鮮甜味突出。反而，吞拿有點怪怪，好似解凍未透咁，而赤蝦大就夠晒大隻，但口感較為膠就唔太合心水。壽司壽司再細分為幾類，其中壽司A款喺一般大路嘢，如吞拿魚壽司、帶子壽司……等等，而B款就幾樣食材配搭嘅壽司。相中B款嘅魚籽醬拌赤蝦、花之戀、蔥花吞拿魚腩海膽，真喺唔錯，刺身食材本身夠新鮮，再以魚籽醬、蟹籽、蔥花、海膽相互配搭，拼發出多層次嘅鮮味。再者，啲壽司飯搓得又比預期好，唔會太實，又唔會太鬆散，帶輕輕醋味。火炙壽司師姐似乎幾鍾意食壽司，所以，再嚟又一份火炙系嘅壽司，選擇共5款，但點解佢唔揀晒，而只選當中嘅4款呢？原來，都只喺隨意而已。所點嘅4款火炙壽司中：燒和牛壽司拌黃芥末籽、火炙海膽醬玻璃蝦、火炙味噌醬蟹棒、火炙三文魚腩，個人心水喺燒和牛同玻璃蝦，前者和牛肉燒到有少少半生熟，嫩滑而富油香，後者海膽嘅甘飴搭上蝦嘅爽甜，出奇地和諧平衡。創作壽司3款以店名命名嘅創作壽司：大、井、町，做成少少波形，點菜紙無話喺乜，但睇外觀，「大」喺以吞拿魚蓉、甜蝦、蟹籽、黑魚籽所組成，「井」則以火炙帶子、海膽、蔥花組成，而「町」就用三文魚蓉、牛油果、吞拿魚蓉、海膽、黑魚籽組成，可謂配搭花心思。唔止賣相做得精緻，味道亦比一般壽司更富層次、多變，而且，做得小巧，可以一啖一件，完全將壽司嘅滋味一次過放晒入口慢慢交融。卷物、軍艦、手卷因為老友都點咗唔少壽司，所以，同樣屬飽肚嘅卷物、軍艦、手卷就無再考慮叫。見到有啲人為食海膽就叫客海膽手卷卻唔食啲飯，跑得山區多，見到啲山區小學生食嘅午飯，嘥嘢嘅事真喺做唔出。炸物食完一輪刺身、壽司，喺輪到香口嘅炸物出場，8款炸物當然樣樣都想試啦，不過，大家近排都有啲熱氣，所以，點炸物就要適可而止。榴槤炸彈喺小弟指定要點，炸得外層香脆，榴槤餡亦都無欺場；墨魚軟骨又唔喺淨得啲軟骨，都連帶埋啲墨魚肉，又幾酥香好食；薯絲蝦，哈哈，今日都點咗幾多蝦嘅菜式，依一款以薯絲包住海蝦香炸，咬落外層卜卜脆，好有薯香，內裡蝦肉仍然爽爽哋，比想像中好食。燒物9樣燒物，同樣喺乜都想試，但眼闊肚窄就要有啲取捨，故揀咗其中5款試試：塩燒牛舌、燒羊架、燒菠蘿、燒魚一夜干、塩燒海蝦。幾款燒物都做得普普通通，牛舌較好，簡單鹽燒，已足以吊起牛舌套有嘅燥味；而羊架及海蝦覺得喺燒過火，入口有啲乾，反而菠蘿燒得唔夠耐，再熱啲，濃縮啲，會更鮮甜；最麻麻喺條一夜干，魚肉嘅肉味喺濃，但肉質保持唔到軟嫩，師姐講笑咁講話好似食鹹魚。天婦羅食日本嘢，又點可以無天婦羅呢，5款天婦羅都喺慣常見到嘅款式，所以，隨意點少少，當睇睇佢哋嘅炸功如何！虎蝦天婦羅似乎喺心態上返本嘅必然之選，虎蝦取貨夠大隻，粉漿有少少厚，但可接受，至緊要唔會食到一口油；南瓜天婦羅亦喺心水之選，粉甜嘅南瓜做天婦羅真喺好適合；而冬菇天婦羅則較少食，以原隻冬菇嚟做天婦羅，效果幾好，脆口中有份軟腍嘅彈牙感。蒸焗菜式味噌焗蠔喺蒸焗類嘅官方超人氣之選，當然要試，另一人氣選帶子北海燒亦都要試吓，焗薯角相信無乜特別啦，反而，嚟多客蟹肉蒸蛋啱我多啲。味噌焗蠔算唔錯，頗有蠔味，不過，焗一焗，隻蠔好縮水，至少一次一人兩客先試清當中嘅味道；帶子北海燒喺加入沙律醬同芝士一齊焗，香噴噴，不過帶子肉都喺細粒；都喺蟹肉蒸蛋得小弟歡心，蒸蛋做得蛋香滑溜，內裡唔足有蟹肉，仲有冬菇，喺一般茶碗蒸嘅蟹肉版，自然多一份鮮甜味。鐵板料理如果夠人多，真想試佢個鐵板牛柳粒，不過，怕就算點一客多得滯食唔晒而嘥嘢，故6款鐵板料理只點咗日式炒雜菌同牛油粟米，當食番多少少纖維質嘅嘢。啲牛油粟米果然充滿牛油香，而且，粟米粒甜到你唔信；至於炒雜菌，都喺啲雞脾菇、秀珍菇、冬菇……之類大路雜菌炒埋一齊，健康素選。一品料理食到家下，真喺九乘幾飽，留肚俾甜品之前，計落都仲有少少虛位，一於點多一客一品料理試吓。幾款一品料理中，兩款鍋物同蟹粥，相信好大份食唔落，清酒煮蜆按人頭俾，應該喺穩陣嘅選擇。真好，果然俾個二人份量細細碗，可以試試又唔怕撐爆肚。蜆肉入口無沙，亦唔韌，帶少少酒香，做得不俗。湯 / 麵拉麵、烏冬當然都喜歡食啦，不過，去到放題，一來依一類嘢唔會做得特別出色，咁飽肚嘢就通常都放棄，二來，睇番佢哋嘅選擇，似乎唔喺有咩特別，就更加唔會試啦。甜品上文介紹過近入口有個自助區，多款甜品可以自由任取，全部都喺做得的的骰骰。小巧精緻，當然唔可以同去大酒店食自助餐相比，但都叫有份心去製造，唔似喺「求求其其」。所以，數一數共有4款日式和果子、吉士泡芙、提拉米蘇、紐約芝士餅、朱古力布朗尼、巨峰提子奶凍、北海道牛乳奶凍、抹茶奶凍。咁有心，小弟當然要支持吓，獨佔一碟甜點拼盤先。日式和果子揀咗櫻花同柨子，賣相幾得架，味道亦唔差喎，外皮軟糯，又唔太黏牙，饀心又唔會死甜；件布朗尼好濃朱古力味，濕潤挺實，內裡雖無混入合桃碎，卻有啲朱古力粒，唔錯；北海道牛乳奶凍勁牛奶味，質感又軟滑。吉士泡芙、紐約芝士餅不過不失，喺提拉米蘇似件咖啡蛋糕多過一件意大利芝士餅，因為無酒香，蛋糕底只喺朱古力海綿蛋糕，非浸咗咖啡酒嘅餅底。自由區邊位仲放有一個雪櫃仔，裡面喺雪米糍同Fruttato Gelato，各試一粒，前者撞手神喺香芋味，啱晒我；後者其實晌一啲甜品店都遇過，當喺即開即用嘅雪糕球，雖然芝麻味極濃郁，但雪死晒，口感跟Gelato喺完全欠奉:(。Movenpick雪糕、Dreyer’s雪糕批除咗任食甜品之外，每位客人仲加送一款極品享受嘅甜點，5揀1：Movenpick瑞士朱古力雪糕、士多啤梨雪糕、雲呢嗱夢幻雪糕、Dreyer’s日本宇治抹茶黑糖迷你雪糕批及呂宋芒果迷你雪糕批。師姐揀咗Movenpick瑞士朱古力雪糕，佢話朱古力好香水濃，雪糕入口軟滑。小弟就喺黑糖粉絲，所以，揀Dreyer’s日本宇治抹茶黑糖迷你雪糕批，抹茶味真喺好幽香，不過，講真，啲黑糖味就點食都唔多覺。依家放題店開到成行成市，無他嘅，作為客人而言，俾兩嚿半水就可以任飲任食，又刺身，又天婦羅……比起食自助餐平一大截，只要質素有番咁上下，就已經覺得回本。而作為餐廳，只緊要客多做旺個場，反正燈油火蠟、人工固定成本，有無客都要支出，多個客就多分收入，而且，放題多多少少屬流水作業，貨源成本又較易控制，唔似自助餐晚晚倒嘢食。今晚嚟到「大井町」，環境、食物質量都叫人稱心滿意，值得翻兜。…查看更多

周末約友人大吃大喝一番, 揀選荃灣新開不久的日式放題, 因為環境舒適寬闊, 坐得舒適又食得開心, 可以慢慢食也夠時間.每位 $258 (星期五,六及公眾假期前),17:30-23:30,  2小時日式放題.openrice 還有生日88折優惠coupon.由於已經book左位, 所以一去到便可以入座, 友人揀選order紙上的食物, 我就出去自助取飲品/沙律生果/甜品.總共有3個大雪櫃, 放了10多款的紙包裝/ 罐裝飲品, 我揀了巨峰提子汁及解茶.幫友人取了蜜桃飲品及烏龍茶等等.還有自助添飲及熱茶, 自行取杯添飲, 很方便也選擇夠多.跟一般的放題有點不同, 就是多了沙律吧, 有新鮮的沙律菜, 清減串燒帶來的油膩感.生果吧也有西瓜, 菠蘿, 哈蜜瓜等等, 外觀吸引頗新鮮, 甜美多汁.取了少量沙律先食, 以作開胃前菜.很快刺身就到, 裝盤美觀更有花卉裝飾.刺身有三文魚/ 吞拿魚/ 油甘魚/ 北寄貝/ 帶子/ 赤貝/ 甜蝦/ 劍魚腩/ 赤蝦/ 章紅魚拌柚子醋/ 希靈魚等等.三文魚厚切新鮮肥美, 油甘魚油香鮮味, 劍魚腩同樣肥美爽口, 希靈魚好多魚子脆卜卜, 吞拿魚較普通.赤蝦較大隻爽口, 但更喜歡甜蝦嫩淋甘甜. 北寄貝偏細塊, 不過都爽口.帶子嫩滑不腥, 又夠厚身. 赤貝又大塊又爽口. 章紅魚拌柚子醋爽脆質感, 而且伴柚子醋清爽開胃.香芒鵝肝卷, 芒果片夠甜, 但鵝肝好奇怪也不似鵝肝, 質感一絲絲, 味道麻麻.花之戀壽司, 三文魚加上脆卜卜蟹籽同沙律醬, 好難唔好食. 蔥花吞拿魚蓉海膽壽司, 吞拿魚蓉好油甘美味, 伴海膽更鮮甜.軟殼蟹卷, 軟殼蟹太淋了, 整件壽司卷好似散開.點了三款, 分別是大/井/町, 但只來了兩款.創作壽司 - 井, 是灸燒帶子, 上面有少少海膽, 但被黑松露的味蓋過, 反而松露味幾夾帶子.創作壽司 - 町 , 應該有牛油果, 海膽及吞拿魚蓉. 但欠缺了牛油果, 所以味道好味, 只不過跟之前的壽司差不多.明太子軍艦, 不辣不咸, 魚籽醃過但不脆卜卜, 味道平平.芥辣八瓜魚軍艦, 芥辣不夠, 味道太溫和, 但八瓜魚彈牙好咬.海膽手卷, 海膽新鮮不腥.吞拿魚蓉手卷, 油甘香夠肥美, 味道好好.手卷材料偏少, 只有面層少少, 但紫菜保持脆身, 即叫即做值得一讚. (冰頭漬)三文魚頭軟骨, 未食過都未見過, 幾特別的前菜.酸酸地好開胃, 三文魚頭軟骨爽脆, 質感幾特別, 味道幾好.蟹肉蒸蛋必叫, 材料豐富, 蒸蛋好滑溜又有蛋香, 蟹肉一絲絲真材實料, 不是蟹柳已經值回票價.味噌焗蠔, 沒有芝士醬汁的膩, 用味噌更有咸香, 味道好好, 只是蠔肉太細粒, 而且有點殼.帶子北海燒, 有洋蔥粒好香口, 加上醬汁creamy 好惹味.帶子雖然細粒, 但質感彈牙嫩滑.串燒- 燒雞骨腸, 鹽燒海蝦, 煙肉露筍卷, 燒魚一夜干 .鹽燒海蝦易去殼而且肉質夠爽口, 鹽燒食出鮮味. 燒魚一夜干也好味, 不腥肉質結實的魚肉, 連少食魚的友人也喜歡.串燒- 菠蘿超甜超多汁, 食時也小心漏汁. 鹽燒牛舌就麻麻地, 太硬太乾身.炸物 - 榴槤炸彈/芝士年糕/墨魚軟骨.榴槤炸彈好爆醬, 濃郁的榴槤味, 餡料也很多, 食完仲有陣陣香味.芝士年糕同樣爆多芝士, 味道清淡的芝士味, 但好creamy好奶香, 年糕比例少, 所以食完唔太飽膩.炸物 - 紫心香芋丸/芝麻雞翼.紫心香芋丸不會爆出餡料, 反而杰身一點, 好香芋頭味, 外脆內軟的質感.每人限揀一款高質雪糕甜品.我地揀左MOVENPICK 雪糕, 朱古力味有好多朱古力粒, 而且味道濃郁. 士多啤梨多果肉, 酸酸甜甜味道清新解膩.甜品區更有和果子, 很精緻可愛.口味有4-5款. 櫻花/抹茶/ 柚子....等等更有蛋糕數款, 重質不重量, 質素頗高的蛋糕.布甸只有抹茶味, 但都是自家制.櫻花和果子, 有兩款, 本以為好甜, 但外觀太吸引忍不住拿了回來, 但原來味道不太甜, 內餡紅豆蓉軟滑, 外層煙煙韌韌.提拉米蘇蛋糕, 輕輕的咖啡味, 加上creamy 奶香的芝士忌廉好好味, 只係底層的蛋糕偏乾.紐約芝士蛋糕, 軟滑而濃郁的芝士味, 食完想再食.朱古力布朗尼, 不會好實也不硬, 估唔到做得咁好味, 朱古力味也很重.黑松露朱古力, 濃厚滑身的朱古力, 也是很好味, 但不要最底的蛋糕會更好, 太乾了.自家制抹茶布甸, 有三層味道, 最頂是抹茶汁, 甘苦茶香. 中間的是軟滑有彈性的抹茶布甸, 奶味及抹茶平衡. 最底是抹茶布甸, 有濃重甘香的抹茶味.當然不少得雪糕糯米滋和雪糕.抹茶雪糕糯米滋, 味道一般, 抹茶味不夠濃.芝麻味雪糕, 芒果味雪糕雪糕雪得好硬, 要先拿回來放軟一點才食. 雪糕質感似雪葩, 易散開奶味不重, 但味道突出. 芝麻味特別重, 喜歡芝麻味的不可錯過.…查看更多