同朋友食生日飯，平時鐘意打邊爐嘅我地，就揀左呢間台式火鍋試下。店員安排左卡位，所以都幾闊落同舒服。我地揀左個$699二人餐，啱晒我地有選擇困難症嘅人🤣 個餐可以揀兩個湯底，包兩份肉，一份海鮮，一份丸，一份菜同一份麵食。佢地有個自助區有涼菜小食同生果。個人覺得涼拌魚皮幾好食，口感爽脆同辣得幾惹味。湯底我地揀左臺式麻辣鍋同胡椒豬肚雞鍋。因為我好鐘意食鴨血豆腐，所以佢地麻辣鍋有得任添鴨血豆腐都幾加分👍🏻但呢個湯底好似冇得揀辣度，所以食落去又唔覺辣。食到咁上下，店員都幾主動話要幫我地加鴨血豆腐，服務都幾好。胡椒豬肚雞湯入面有4件雞肉(分開上)同豬肚，個人幾鐘意呢個湯，唔會好咸同飲落啲胡椒湯，辣辣地幾惹味。肉類份量都算足，食落新鮮有肉味，而且唔韌。企鵝丸造型好得意🐧不過就有啲粉，口感又唔似丸又唔似滑，嗌番普通嘅應該好食啲。冬粉係必嗌，好吸湯，超好食👍🏻我地都額外嗌左杯大給紅袍珍珠奶茶，好大杯😆奶香幾濃，珍珠都幾彈牙。最後送左個梅子茶凍做甜品，啫喱食落有淡淡茶味，配埋酸酸甜甜嘅梅子汁，好啱解膩🤣…查看更多
