繽紛維苑餐廳 (已結業)

移民外地多年的朋友回港旅遊數天，入住天后的維景酒店，當然要約出來聚一聚啦；最方便定必是酒店內的餐廳了；自助餐老少咸宜，就算待久了一點，朋友的兩個寶貝兒子也不至於太無聊吧！由酒店的正門，經扶手電梯上一樓，再經圓型樓梯到二樓，就會來到繽紛維苑餐廳。吃自助餐，自己通常會先巡視一圏，看看有什麼想吃的。第一輪先是主攻蔬菜類，之後才到海鮮、主菜及甜品。菜蔬的選擇也不少，首先看到的便是我的至愛火箭菜，再來還有車厘茄、粟米、薯仔、青黃椒、秋葵、鷹咀豆和紅腰豆等可供選擇；隨個人喜好選擇醬汁 - 千島醬、法式沙律醬或日式沙律醬，不過還是陳醋及橄欖油最得我心，好味又健康！時值大閘蟹季節，沒有不吃的理由罷！這江蘇大閘蟹的蟹糕也真不少，如不是要保留後勁，一定要掃番三、四隻才會罷休。凍海鮮區也有不少選擇，龍蝦、翡翠螺、長腳蟹、大蝦、青口等，看真點，連大閘蟹也來個冰鎭？還是揀我最喜歡的龍蝦吧，雖然size不是很大，肉質卻是爽口彈牙，而且蝦膏也不少呢。菜胆雞和清蒸龍脷柳，雞肉嫰滑，沒什麼雞味是意料中事。蒸魚的火喉可能過了火，有些少嚡口。原來雪莉酒及port 酒是無限量供應的，喜歡飲酒的我當然要一試啦，用它來配襯黑毛豬火腿及芝士，更是適合；芝士有很多種不同的味道，例如有：Herbes Cheese,Port Salut,Edam Cheese,Walnuts Cheese,Blue Cheese,Emmental Cheese和Le Camembert Cheese，喜歡芝士的人，一定會像我一樣，吃個不停。😋酥炸墨魚餅外層炸得酥脆，肉質彈牙，但卻欠缺墨魚味。野菌忌廉湯 ～ 其中一樣我最喜歡的湯品，雖然明知道會好飽肚，也忍不住吃了大半碗。😅刺身有三文魚、八爪魚、赤貝、甜蝦和醃帶子，每樣也各吃了少許。還可以Order鵝軒、燒蝦、羊架和燒蠔，當然要試試了；鵝軒外脆內軟，上面的士多啤梨有助降低油膩感；燒大蝦的時間掌握得剛剛好，亦很鮮味；羊架大大件，肉質鮮嫩不會太膻；燒蠔則比較乾身，肉質有點兒韌。終於到我至愛的甜品時間（第二個胃開動），花多眼亂，選擇困難症又發作了，最後選擇每樣一件，一於盡情放縱一下。軟芝士蛋糕、意大利芝士餅、美國芝士餅、燕窩葡撻、鮮果班戟、牛油乾果蛋糕、伯爵茶芝士蛋糕、芒果拿破崙、馬卡龍、朱古力蛋糕、迷你鮮果撻、士多啤梨蛋糕、木糠布甸、涼粉丶椰汁黑糯米布甸；還有一些懷舊的糖果、如牛奶糖、可樂糖、山楂餅、朱古力豆、陳皮梅及珍寶珠、白果腐竹糖水和Haagen-Dazs 雪糕。最後食生果（士多啤梨、哈蜜瓜、西瓜、菠蘿）平衡一下甜膩的感覺。飲品有薑茶、咖啡、熱朱古力、橙汁、蘋果汁和西柚汁，食了這麼多大閘蟹，當然要飲番杯熱辣辣的薑茶來驅一驅寒。原來加$88 便可任飲多款紅白酒，可惜朋友不好杯中物，只好自個兒獨酌，實在有點不能盡興，如好此道的朋友只是飲酒都值回票價了。每位只是$438 ，種類多、質素也不俗，抵食之選！…查看更多

繽紛維苑其實曾經光顧過一次，不過，已經喺好多年前嘅事，而且，仲喺星期日嚟食晏晝個自助午餐，夜晚都喺第一次到訪。近排聽友人嘅評價話唔錯，又啱啱收到餐廳邀請，所以，專程走過嚟試試，睇吓喺咪咁有水準先。餐廳位於酒店2樓，環境簡約，入門口左邊喺全組落地大玻璃，夜晚嚟就唔及日頭嚟感覺咁開揚，不過，由於樓底高，枱櫈編排闊落，所以，整體感覺依然舒服。順便講講服務，碗碟收拾、食物補充都好到位，就好似自助餐去到9:30pm，但9:15pm都仲見廚師為食物補貨，而啲侍應都禮貌、勤快。擺放食物主要喺晌開放式廚房對出嘅區域，夠集中，唔使四圍遊。湯品、凍海鮮、冷盤、芝士、麵包、沙律、刺身、湯粉面、熱盤、甜品、自助飲品吧……等等大部份9自助餐食物都會有。星期一至日及假期成人劃一收$428 + 10%（長者及小童收$328），部分信用卡仲有85折。餐酒推廣餐廳正做緊美酒配佳餚為主題，所以，一系列紅酒、白酒任飲推廣，每位都只喺額外俾多$88，如果好餐酒嘅朋友真喺抵飲到極。而每晚3款紅，3款白，紅酒嚟自智利、法國及阿根廷，而白酒則嚟自智利、西班牙及澳洲等出名出產葡萄嘅地方，每隻酒更有晒詳細介紹。自助飲品吧如果唔飲酒嘅朋友故然可以慳番依$88，但自助飲品吧仍有好幾款選擇提供俾你，是晚所見就有橙汁、西柚汁、蘋果汁、咖啡機、紅茶，較少見喺有部朱古力機，相信幾啱啲細路仔心意。由於咖啡及朱古力都喺機沖，一沖就喺一杯，所以，如果想嘆杯Mocha就要一次過飲兩杯先得，哈哈！生果沙律先上場第一碟喺慣例嘅沙律，不過，今次就唔配冷盤，而喺配生果。沙律吧喺比較弱嘅一環，共8款沙律或沙律配料，個人評價都喺普普通通貨色，另有3款醬汁供配搭，所以一碟過乜都可以試晒，再拼三幾款生果，純粹開開胃。席前燒烤除咗上述提及嘅食物、飲品外，另一亮點喺席前燒烤及每週精選粉麵，前者有M5澳洲和牛、紐西蘭羊架、法國鵝肝、美國燒蠔及印尼虎蝦，即點即燒，要多要少，如何配搭，一切自決，隨後由侍應送上；而後者則有白汁煙三文魚意粉、龍蝦汁蜆肉長通粉及叻沙湯麵。晌攞沙律時，順便點埋個席前燒烤，食完個沙律就啱啱好送到。因為目標喺想試勻所有嘢，所以，燒烤就每樣食材要一件。所有嘢都喺即點即燒，故然「新鮮」熱辣，和牛富肉香，羊架羶香軟腍，鵝肝配脆法包，油潤甘香，燒蠔夠大夠厚肉，蠔味足，虎蝦焦香爽口。餐湯、麵包湯品中湯代表喺青紅蘿蔔煲瘦肉，西湯就喺蕃茄濃湯；而麵包籃有頗有多選擇，共8款麵包，但最窩心喺麵包籃後有座大焗爐，可以將麵包翻熱，熱辣辣嘅麵包一定好食好多，牛油採用總統牌，另一用心細節位。小弟要了個蕃茄濃湯，嘅蕃茄味酸香濃郁，好對辦，而麵包揀咗一個高纖麥包及一個竹炭包，烘熱之後真喺好好食，前者煙韌而有麥香。凍海鮮陣容就算無生蠔，都一啲都唔失禮，因為有波士頓龍蝦、麵包蟹、松葉蟹腳、加拿大翡翠螺、紐西蘭藍青口、熟海蝦、去殼海蝦，而且，成晚不時都保持貨源充足，最正斗喺龍蝦為開蝦身同蝦鉗，想食膏連肉，就梗喺揀前者，怕膽固醇人士就當然揀後者好啲啦。一大碟海鮮拼盤睇見都爽，小弟唔貪心，樣樣執啲。龍蝦肉又爽又鮮，麵包蟹膏多甘飴、肉質結實，長蟹腳鹹鮮帶海水味，翡翠螺大粒厚身、咬口好食，而兩款海蝦都鮮甜彈牙，當然，以去殼一款食得夠爽啦，唔使拆殼啖啖肉！冷盤、精選芝士食完鮮味嘢，再食啲濃味嘢， 冷盤及芝士類都稱得上多選擇。先講冷盤，最搶眼就肯定喺隻西班牙黑毛豬火腿，此外，仲有煙三文魚、刁草三文魚、燻魚、凍切腸及燒牛肉。至於芝士更多達7款，包括：法國嘅Port Salut Cheese、Walnuts Cheese、Le Camembert Cheese、Herbs Cheese、荷蘭嘅Edam Cheese、瑞士嘅Emmental Cheese及丹麥嘅Blue Cheese，可以伴以克力架、餅乾條、提子或蔬菜條同食。上文講過美酒配佳餚，就算你無打算加錢享用餐酒，大廚都特意安排兩款酒嚟伴黑毛豬火腿及芝士，前者可夾雪莉酒，而後者不妨搵砵酒襯一襯，會有出人意表嘅效果，而兩款酒都喺無限制隨意享用。而小弟嘅冷盤芝士拼盤，雖然砌出嚟個賣相唔喺咁靚仔，但樣樣食材有質素，就好似啲黑毛豬火腿，油潤甘香，燒牛肉有肉香，而幾款芝士各具特色，今期最愛喺Walnuts Cheese，好有合桃嘅香味，非常特吃。刺身刺身有三文魚、鯛魚、八爪魚、北寄貝、帶子粒、甜蝦，而且切好晒放晌凍櫃內，方便客人取用。雖然有影到相，亦打算會食，但坐坐吓真喺無為意唔記得食！烤肉銀車烤肉喺晌自助餐必見嘅食物，常有嘅喺西冷、肉眼，而晌度所見喺燒有骨牛肉，望落燒得好靚，旁邊仲配埋烤南瓜、薯角、炒雜菌及豬肉腸，完全可以砌一碟烤肉主菜。因為仲有熱盤、甜品未食，所以，就麻煩師傅燒牛肉要薄切，啲牛肉燒到恰到好處，肉心保持粉嫩，口感軟腍，又有肉香；其他配菜，燒南瓜及炒菌就最好食。熱盤一共有7樣嘢搭兩個飯：孜然羊肉/豬肉串、XO醬炒鮮魷、菜膽雞、咕嚕肉、泰式燒豬頸肉、香草雞翼、紅酒燴牛肉、炒飯及白飯。好少會無蒸魚，唔知喺咪期間轉咗都無為意。我就只揀幾款心水嚟試試，兩款肉串都好食，尤其羊肉串，孜然味啱啱平衡番啲羊羶，怕羶嘅人都可以放心食；菜膽雞亦都正，雞有雞味，最緊要肉質入口嫩滑；燒豬頸肉好爽，而燴牛肉鬆化且有紅酒香氣。甜點最尾一節，就喺飯後甜點，唔食就有啲唔安落，尤其有咁多甜點在眼前。要數一數，概略一望都有超過廿款，除咗放晒出嚟，有啲仲晌凍櫃內，而且，大部份做得的的骰骰，當然顧及唔同人嘅口味，有啲喺頗大路嘅款式，如啫喱、豆腐花，但特色嘅亦有不少，有咩選擇就唔詳細逐樣寫出嚟，揀數款個人嘅心水再慢慢分享。第一輪拎咗幾粒迷你馬卡龍、芒果慕絲蛋糕、拿破侖、朱古力餅、椰汁紅豆糕、伯爵茶慕絲蛋糕、芒果布甸、迷你果撻。啲馬卡龍做得唔錯，外殼脆脆，咬落煙韌少甜；拿破侖喺加入合桃嘅懷舊版做法，酥皮鬆脆，奶油軟滑；朱古力餅好香濃，而帶點甘苦味；其他甜點都不俗，不過，伯爵茶慕絲蛋糕嘅茶味好淡，淡到唔似伯爵茶味。小弟都算喺甜品死粉，食完第一輪仲有空間，當然要再下一城，第二朝喺迷你香蕉班戟配Häagen-Dazs雪糕（士多啤梨及朱古力口味），班戟雖然喺預製，但效果都算OK，少忌廉而滿滿蕉肉，至於雪糕，HD點都喺一個保證，尤其士多啤梨口味，內裡加入果肉，寧舍好食。懷舊零食晌自助飲品吧旁，擺放咗一啲本土經典懷舊零食，有可樂軟糖、嘉應子、史蜜夫軟糖、牛奶糖、花生朱古力豆、山渣餅、珍寶珠、熊仔糖，如果你喺80前，應該一啲都唔陌生。凍海鮮及席前燒烤都喺回本之選；如果喜歡食芝士嘅朋友，又可以一次過試上咁多款式；好餐酒嘅朋友，額外加錢，就更喺划算到不得了。所以，繽紛維苑嘅性價比不俗，覺得喺滄海遺珠呀！…查看更多