近年香港開咗唔少高質日式拉麵小店，唔使飛日本都食到用心熬製嘅湯底同拉麵，今次就同大家介紹幾間值得一試嘅地道拉麵小店！
日籍廚師主理雞湯拉麵 道
圖: 隱藏喺屯門嘅小店，招牌雞白湯拉麵用上長時間熬製嘅濃厚雞湯，湯底打至綿滑有泡，味道濃郁又帶住自然雞香，拉麵掛湯力出色，雞叉燒更係入口即溶，口感嫩滑兼充滿骨膠原感。食到一半加埋店方建議嘅檸檬葉，湯底層次更加分明，令人回味。另外鹽雞清湯拉麵都好有水準，湯底清澈透亮，但入口一樣鮮香甘甜，雞味突出又唔會覺得油膩，飲落清爽舒服。除咗拉麵，唐揚炸雞亦炸得外脆內嫩又多汁，雖然排隊需時，但整體體驗非常值得！
特色檸檬拉麵 一虎
圖: Chloechancc
呢間灣仔小店主打特色拉麵，特別係招牌檸檬拉麵，好有記憶點。拉麵用上自家製豬骨湯底，加入秘製檸檬醬，再配上幾片新鮮檸檬，飲落湯底酸酸甜甜，清新開胃，唔會覺得膩，特別啱夏天食。叉燒肥瘦適中，口感軟嫩，成碗拉麵清爽又帶層次。另外亦有黑蒜油豬骨湯底拉麵，湯底濃郁但唔會死鹹，配搭彈牙麵條同木耳，食落順口又滿足。呢度拉麵仲可以自由加配料，自選麵條硬度，成餐都好有自己風格，難怪經常都大排長龍。
雞白湯愛好者必試 野見拉麵
圖: arrr伯
另一間雞白湯拉麵小店！裝修簡潔，有種低調嘅日本味道。最出名係佢哋用足料熬製嘅雞白湯拉麵，湯底乳白濃厚，帶有淡淡蒜香，飲落口感幼滑又帶膠質感，完全唔膩，真係飲到停唔到口。拉麵用幼身麵，掛湯力唔錯，雞胸肉嫩滑，叉燒粉嫩，溏心蛋都做得出色，食完真係超滿足。如果鍾意清啲嘅，可以試埋雞鹽味拉麵，湯底清甜啖啖雞香，麵條加蔥一齊食更加醒胃。想食高質雞湯拉麵，呢度真係值得排隊一試。
牡蠣蠔拉麵 海老名沾麵
圖: Fia"
主打蝦汁沾麵嘅店舖，但大推佢哋限定嘅牡蠣拉麵，一碗拉麵入面充滿無限心機。師傅將廣島蠔煎到金黃香脆，再剪碎放入海鮮湯底，湯底用蔬菜同魚熬製，湯頭鮮甜帶微微麵豉香，飲落層次豐富，唔會太重口味。拉麵口感彈牙，溏心蛋同大蔥都配搭得好好，食到後段仲會有啖啖蠔肉，超鮮味！配料方面都有心思，溏心蛋流心適中，京蔥煎香過添咗層次，仲有柚子、海帶提味。拉麵用微粗身麵條，幾有咬口～想食記得早啲去！
文: Yanica
