漢堡食得多，有時會想下飯堡，轉換一下唔使咁悶嘛。但除咗啲大型連鎖快餐店有得食之外，香港都唔太多地方搵到飯堡呢樣嘢。Good News~ 灣仔開咗間新嘅。
全舖暫時有9款飯堡，其中最吸引嘅唔使問，一定係主打嘅龍蝦飯堡。用嘅係加拿大龍蝦，拆殼後原隻上，淨係視覺上都先贏一仗。全因老闆話想做到同坊間唔同，要行日式路線喎。
講返點整，飯堡，顧名思義，即係用「飯」代「包」，先將嚟自宮城縣嘅珍珠米煮好，壓過模後再冷藏備用。有柯打嗰陣就將飯糰沾上蛋漿同麵包糠，再落鍋炸到金黃色，切開一半再唧醬汁同擺放材料。咁龍蝦飯堡當然就係放龍蝦啦，加多塊芝士，即場用火槍燒燒佢，焦焦地，頂頭落埋沙律醬最後包埋「三面台」嘅紫菜，完。
飯堡炸到脆卜卜好鬼香口，龍蝦肉質爽口，一啖食到幾種口感係幾豐富嘅，而且又飯又肉，都幾飽呀。不過係會食得有些少論盡咁啦，多料吖嘛科科~~~
而鹿兒島產和牛漢堡，係純黑毛和牛嚟，煎香咗都係好juicy，肉味香濃，夾埋酸瓜同蕃茄食，好多汁。
松葉蟹飯堡睇落好似冇咁搶眼，但查實好多工夫呀都，又要拆蟹肉，連蟹膏抽完出嚟之後都有重新再調過味㗎，配埋青瓜粒粒咁食，鮮甜得嚟唔會感覺太膩，亦唔使怕腥。
另一款同樣好受歡迎嘅係京蔥鰻魚飯堡，冇計，香港人聽到鰻魚呢兩個字就已經會雙眼發光，呢度仲要肉身肥厚，燒汁味香。其餘仲有豚角煮溏心蛋、燒汁赤雞、牛油果七味三文魚飯堡等選擇。
京．33
地址：灣仔活道1A號地鋪
文、相：Kar