年尾就遇到第四波疫情，唔少香港人都叫苦連天……不過開飯仔喺旺角區發現咗一間超平泰式海南雞飯！餐廳選擇唔多，只係賣四樣嘢，分別係泰式海南雞飯、泰式豬手飯、青木瓜沙律及芒果糯米飯。而海南雞飯同豬手飯都只係賣$30，又有堂食，旺角區嚟講真係好罕見。
唔好以為賣得平質素就唔好，海南雞飯表現絕對水準之上，都幾有誠意。選用三黃雞，雞味突出，製作方法呢就將原隻雞放入加咗香茅、斑蘭葉同檸檬葉嘅湯水裏熬一小時，雞肉滑嫩，而且所有雞肉都起晒骨，啖啖肉，點埋自家製酸酸甜甜嘅醬汁又幾開胃。而油飯都係用心之作，選用泰國香米，加入香料一齊炒香後再用雞湯煲，粒粒分明香料香氣突出。
泰式豬手飯用滷水汁滷製兩小時，入味肉質軟腍，而且皮都唔會太肥膩，送飯食一流。
另外兩個小食青木瓜沙律及芒果糯米飯都係正常水準，都只係賣$12及$18，食個飯再加個前菜或甜品都只係四十幾蚊埋單，絕對係糧尾恩物。
地址: 旺角通菜街1A-1L號威達商業大廈地下M號舖
文、相、片: Yanica