愈嚟愈多台灣飲品店進駐，一陣又珍珠奶茶，一陣又手搖果茶，今次輪到主打果醬鮮奶泡嘅求籤茶飲店。新店選址喺九龍灣嘅商場內，買完嘢飲仲可以求支籤解個惑。
茶飲店主要提供5大系列：原茶、鮮奶、可可、水果茶、漸層鮮奶泡。水果茶係以鮮果入醬，加入牛奶打成帶有果香嘅鮮奶泡。首推係台灣大熱嘅梨園吹鳳曲。茶底選用較清香嘅包種綠茶，以台灣運到嘅菠蘿果醬同牛奶打成奶泡，奶泡滑口帶甜，而且仲食到啖啖果肉。
另一款以果醬製作嘅係草莓時光。同樣都係包種綠茶茶底，轉成士多啤梨果醬同牛奶製作奶泡，飲落帶有陣陣果香。
每杯嘅奶泡都係即叫即打，而且因應唔同飲品而有唔同嘅製作，好似雪松烏龍嘅奶泡，則係由牛奶加蜂蜜打成，綿密滑身，以微甜配襯清香嘅烏龍茶底。
各位珍珠控就唔使諗咁多喇，滿杯珍珠係你哋嘅必然選擇。啲珍珠多到，佔咗成杯三分之二有多，開飯仔實測係咁易吸一啖，都有十粒八粒珍珠啜到入口，而且啜極都仲有，大滿足。
呢杯士多啤梨沙冰則係期間限定嘅，片片士多啤梨貼滿杯邊，味道清甜。
舖頭仲設有四個求籤筒，分別係人生、感情、學業、事業，買咗嘢飲就可以抽支籤，去六十甲子籤詩箱度搵返對應嘅籤文，仲有本記載住三國演義、水滸傳等經典文學嘅「解籤本」，自行求解，不過信不信就由你啦~
語菓
地址：香港九龍灣淘大商場第二期二樓S7店