天氣開始熱啦，最啱就係約埋朋友或者另一半，一齊搵間環境舒服嘅餐廳嘆個早午餐。今次就精選幾間氣氛好、食物又有水準嘅brunch好去處，輕輕鬆鬆迎接炎夏～

意式燒烤週末早午餐 La Favorita  

每逢星期六推出期間限定「意式燒烤週末早午餐」，以意大利傳統嘅grigliata為靈感，將優質食材用明火慢慢烤香，保留原汁原味。餐廳環境悠閒，幾啱朋友或者情侶嚟chill吓。前菜選擇豐富，例如布袋芝士配烤甜椒、冰鎮茴香橙片沙律等，味道清新開胃。主菜方面無論係陸地或海鮮選擇都同樣精彩，有和牛牛柳、烤羊排、波士頓龍蝦、三文魚扒、原條海鱸魚等等，配搭唔同烤蔬菜、茄子蓉、酸甜漬菜等，分外滿足。甜品包括開心果西西里忌廉卷餅同雪葩三重奏，為初夏早午餐加添一份清新甜意。

週末Live Music早午餐 Calle Ocho  

以馬德里舊城風格為靈感，主打正宗西班牙菜，每逢星期日都有Live Music早午餐活動，可以一邊欣賞佛朗明哥、法德戈等西班牙音樂表演，一邊嘆豐富嘅早午餐。餐點方面，必試佢哋嘅西班牙海鮮焗飯，飯粒吸晒海鮮湯汁，香濃入味；流心煎蛋配薯仔肉腸係另一款人氣之選，蛋汁流出嚟混埋香腸同炒薯仔一齊食，鹹香惹味。仲有炸薯粒配辣茄醬外脆內軟，加埋帶辣味嘅醬汁，簡單、邪惡、開胃！

「Nose-to-Tail」週末早午餐 Carna by Dario Cecchini   

呢間意大利風格扒房料理曾獲米芝蓮指南推薦，現時每逢週末推出Nose-to-Tail週末早午餐，主打手工意粉、招牌炭燒牛扒同精緻甜品。頭盤同配菜可以無限追加，有黑松露牛肉他他、托斯卡納燉牛肚、薄切烤牛肉配吞拿魚醬、意式芝士沙律等等。主菜重點係炭燒牛肉拼盤，如黑松露豬肉腸、慢燒牛肋骨、澳洲安格斯、美國M5和⽜Chuck Tail Flap同意大利帶骨肉眼等多款選擇，牛味濃郁而且燒得啱啱好，啱晒鍾意肉香嘅朋友。最後仲有經典意式Tiramisu配Espresso作結；你亦可以升級配無限暢飲氣酒、紅白酒、Cocktail或香檳，夠晒盡興。

供應時間：逢星期六、日及公眾假期中午12點至下午3點

「味遊歐陸」週日早午餐 懷歐敘  

如果你想喺週日享受一場歐陸盛宴，呢個早午餐一定唔可以錯過～以多國風味為主題，全層設有多個即煮美食站，邊食邊欣賞廚師即場烹調，分外有氣氛。前菜選擇超過二十款，包括風乾火腿配蜜瓜、水牛芝士、法式凍批同多款芝士拼盤；海鮮控必試波士頓龍蝦、蟹腳、虎蝦等冷盤海鮮。主食方面有即場製作嘅野菌忌廉粗管麵，廚師會即席喺巴馬臣芝士輪入面拌麵，鹹香濃郁好邪惡；唔可以錯過嘅仲有瑞士Raclette烤芝士，淋喺熱薯仔上面，香氣撲鼻。烤肉控亦有選擇，即切肉眼扒、燒春雞皮脆肉嫩，樣樣都好高質。每位客人仲可以選擇主菜，例如法式寶雲酥羊架、炸豬扒、紙包比目魚或海鮮燴飯等，甜品有招牌法式梳乎厘，綿密輕盈，食完真係捧住個肚走。

供應時間：逢星期日上午11時30分至下午2時30分

文：Yanica
編：Cathy