想嘆返個Perfect Tea？Easy啦！呢間以小紅鶴為主題嘅茶飲店，繼中環店後今次開到去赤柱，唔單止有得飲新店限定特飲，今次仲同埋傳統餅店泰昌合作，有埋新鮮即製嘅熱辣辣蛋撻食，一於搵個週末去chill 吓佢！
檸檬西瓜沙冰、小鳯梨茉莉沙冰($49)
以原個西瓜及鳯梨盛載，清甜解暑，夏天飲真係一流！最啱就係拎住同周圍嘅裝飾打返個卡～
芒果椰子茉莉($39)
芒果味香濃，再加上茉莉茶及椰子，果味及茶味恰到好處，係果茶師嘅私心推介！
厚燒牛油果多(HK$49)、鹹牛肉芝果多(HK$46)、厚燒芝味多(HK$43)
除咗飲品仲有新店獨有小食，呢度嘅果漾厚多系列全部都係用咗泰昌每日出爐嘅麵包製作，口感特別鬆脆。芝士控要試吓厚燒芝味多同鹹牛肉芝果多，有濃濃芝士香，想Fresh啲又可以試吓牛油果嗰款～
講到泰昌又點可以唔食蛋撻啊！呢度嘅蛋撻新鮮即製，除咗曲奇皮同酥皮，仲有特濃3.6牛乳撻，全部都滑捋捋㗎！
店舖內外都有唔少打卡位，週末去赤柱玩的話不妨嚟呢度飲杯茶食件撻～
地址: 赤柱佳美道23號赤柱廣場2樓207號舖
文、相、片: Yanica