想喺香港地搵一間高質又平民價嘅天婦羅店？中環天婦羅天海最近於北角商場內開設副線品牌天海家草庵，同樣主打天婦羅，但價錢就親民得多，定價比本店平足一半。好似最平$68就食到一碗基本入門版嘅天丼啦！

山葵天丼($68)

雖然定價平，食材就無可能跟足本店一樣咁名貴，但餐廳依然堅持選用新鮮食材。而且炸漿配方、用油、醬汁同米飯都同本店一樣，炸漿由天海日本師傅傳授，選用兩種炸粉混合，加入冰水，特別薄而且香脆鬆化。

山葵天丼係基本入門版，有海老、雞肉、竹輪及兩款野菜，適合每款都想試吓嘅朋友，而且$68就食到！  

軟殼蟹天婦羅丼飯($108)

加入原隻軟殼蟹天婦羅，香脆仲食得出蟹膏，味道香濃。原隻天海流心蛋，先將蛋烚過後加粉漿炸，時間控制得啱啱好～流心蛋黃、秘製醬汁加埋越伊吹日本米食真係好滿足！

海鮮天婦羅定食($128)

想食豐富啲可試試海鮮天婦羅定食，套餐包括7款天婦羅，包括海蝦、梅醬紫蘇鯖魚、帆立貝、竹輪、軟殼蟹、墨魚和野菜，更可自行選配飯或烏冬，附送埋沙律及前菜添。

天海家草庵  

地址: 北角和富道21-53號和富地庫5758號舖

文、相、片: Yanica