 | Simply Nutrition 營養師陳小艷（Sharon），香港大學食物及營養學畢業，並取得社區營養深造證書，曾於不同機構分享營養知識。fb專頁: nutritionsharing |
（編按：過年前同大家講咗4個致肥嘅壞習慣，今日就同大家講埋另外嗰4個先。）
壞習慣5：食得唔好嘥
如果每次你都抱住食得唔好嘥嘅心態硬逼自己去清走飯桌上嘅餸，就好容易攝取過多熱量。與其要清剩飯、剩餸，不如下次點餐時點少啲、煮野食時煮少啲份量或者留到下一餐再食喇！
壞習慣6：少飲水
或者你都聼過有啲話飲水都會肥，咁到底飲水會唔會肥呢？答案係否定嘅，因為水冇熱量，卡路里係零，所以唔會致肥。相反，水有助體內嘅營養物運送及清理代謝廢物。有啲人怕水腫而不敢飲水，其實係錯誤嘅想法，想改善水腫問題反而應該多補充水分，咁先可以有效加速身體代謝。
壞習慣7：唔鍾意食蔬菜
蔬菜含豐富膳食纖維，可增加飽肚感，而且蔬菜所含嘅熱量非常低，一碗灼菜都少過50卡路里，如果你平時食蔬菜唔多，就會好易食多咗其他相對較高卡路里嘅食物㗎喇！
壞習慣8：食野分心
你會唔會一邊食飯一邊睇電視？又或者一邊睇戯一邊攞著一大包薯片嚟食？其實咁樣好易一個唔小心就食多咗份量。為咗避免熱量攝取過多，建議食飯時先將要食嘅份量分裝到小碗，食完即止。處理零食嘅方法都可以咁做，唔好一打開零食就食唔停，可先將要食嘅份量攞出，剩低嘅零食記得收起先，以免欲罷不能，食完又食。
想keep住每日都知多一點點如何營養瘦身變靚啲？記得like我開設的fb專頁啦！
※上述內容純屬作者個人意見，不代表本網立場。※