返工返學咁忙，偶爾都要搵啲地方「叉叉電」，舒舒服服食餐好嘅，輕輕鬆鬆飲杯嘢！今次為大家推介觀塘一間高質嘅酒吧餐廳【House FiftyEight】，環境超級寬敞，設有露天座位，餐廳內部設計充滿現代感，門口仲放咗架超有型電單車。唔同一般酒吧餐廳，呢度除咗提供精緻西餐同埋特式雞尾酒外，仲設有飛鏢機、Beer Pong、桌球枱、足球機等玩樂設施，超適合約班朋友一邊食嘢一邊玩！

【House FiftyEight】最近推出咗幾款好抵食嘅午市套餐。每份套餐包含主菜、是日餐湯、沙律、餐包及熱飲1杯。無論係肉食愛好者定素食者，相信都可以搵到心水。

肉食愛好者可以試吓烤美國CAB安格斯牛西冷，火候掌握得宜，外層焦香，內裡粉嫩，肉香突出。至於烤法式羊架 ，完全冇羶味，外層帶有微微焦香，食落啖啖肉。

意式燴豬仔髀燴得好入味，豬仔髀完美吸收醬汁精華，每啖都食到好濃郁嘅蕃茄同香草味。味噌煮和牛面頰燉得軟嫩，入口即化。味噌醬汁帶微微甘甜，濃郁得嚟又唔會過鹹，襯托出和牛天然油香。配菜浸住味噌湯汁，變得更加入味。呢個真係一試難忘。

佢哋嘅素食同樣出色，黑松露野菌意大利飯散發濃郁松露野菌香氣，令人食指大動。飯粒煮得恰到好處，creamy之中帶少少咬口，配埋野菌，令口感更添層次。鮮茄素肉丸意粉掛汁能力高，素肉丸幾有口感，配埋酸甜度恰到好處嘅蕃茄醬，開胃又清新，夠哂滋味。素食都好有驚喜！

如果你都想搵個地方chill住食餐好嘅，無論係lunch定放工後happy Hour，呢度都係個唔錯嘅選擇，一次過滿足晒你所有願望！佢哋仲歡迎大家帶備手提電腦光臨餐廳，享用輕鬆工作環境，或與公司同事team building添！