想搵一間環境舒服、食物精緻嘅樓上Cafe？【The 5B Private Corner】絕對係個好選擇！呢間位於荃灣嘅文青Cafe，以木系裝潢打造溫暖舒適嘅氛圍，令食客可以悠閒地品嚐美食，甚至欣賞遠處嘅海景。餐廳主打西式料理，更設有素食菜式，價錢親民，分量十足，非常適合朋友聚餐或慶祝特別日子。

嚟到【The 5B Private Corner】，梗係要試吓黑毛豬潛艇堡，麵包外脆內軟，黑毛豬肉質鮮嫩、香氣十足，調味恰到好處，完全唔會過鹹。加上精心挑選嘅配料，令味道更添層次。而愛食烤雞嘅你一定唔可以錯過佢哋嘅香草烤雞，外皮烤至金黃香脆，內裡仍然肉汁豐盈，每啖都充滿濃厚嘅香草味。如果你鐘意海鮮，不妨試吓檸檬蒜香忌廉藍青口香草配牛油多士，檸檬嘅清香加上蒜香，兩者融合得恰到好處。青口鮮美多汁，完全唔會有腥味。食完青口後可以用香草牛油多士點個忌廉醬，香脆多士吸收醬汁後非常惹味，令人欲罷不能！

呢度仲有唔少特色飲品，香橙梳打美式咖啡飲落有驚喜！初入口時先感受到清新橙味，然後慢慢滲出咖啡香，飲落回甘而不澀，搭配梳打更添清爽感，非常適合炎炎夏日提神！平日返工返學飲厭咗齋啡嘅話，不妨試吓呢款飲品。

呢度唔單止食物出色，服務更係貼心到極致！如果客人在預約時註明係慶祝生日，餐廳或會提供生日驚喜畫碟服務，上蛋糕時會播生日歌，蛋糕碟上仲會寫上壽星名，畫上卡通人物或祝福語，為壽星帶來意想不到嘅驚喜，打造難忘時刻！

呢間Cafe無論係朋友聚餐、家人慶祝、情侶約會，甚至一個人Chill吓都非常適合！如果你鐘意文青Cafe，又想試高質西式料理，唔試【The 5B Private Corner】就走寶啦！