想喺灣仔搵高質素又抵食嘅晚餐，【大堂咖啡廳】係一個絕佳選擇！呢度嘅半自助晚餐涵蓋各類美食，包括頭盤、沙律、精選熱湯、冰鎮海鮮、甜品雪糕等，全部無限供應，仲可以自選西式或亞洲風味主菜。 餐廳環境新淨，設計簡約時尚，令人一入座已經感覺輕鬆自在。落地玻璃令空間感更加突出，枱面亦夠大，可以輕鬆擺放多款美食，絕對適合約埋朋友或者家人一齊慢慢享受美食。

半自助晚餐最大嘅亮點之一，當然係冰鎮海鮮！長腳蟹腳、青口、凍蝦，全部都好鮮甜。長腳蟹肉質彈牙，食落啖啖肉，帶有天然海水鮮味。青口肉質細嫩，鮮美可口。而凍蝦爽口彈牙，蘸上醬汁，更添風味。

湯品方面，餐廳提供中西湯品，選擇豐富。例如有袪濕冬瓜薏米湯，湯底非常清甜，冬瓜爽口且吸收湯汁精華，美味暖胃。而南瓜忌廉湯則口感細滑，帶有濃厚南瓜甜香。

半自助晚餐仲可以自選特色主菜，每款都精心製作，水準極高。如果同朋友一齊去，可以點唔同款嘅主菜再互相分享，享受更多美食。澳洲羊鞍伴時令薯菜，羊鞍烤得恰到好處，火候掌控得宜，表面微微焦香，而內裡仍然保持粉嫩肉質，入口完全無羊羶味。黑醋醬及韓式醬煮牛肋骨配絲苗白飯，牛肋骨炆煮入味，肉質軟腍，黑醋醬帶微酸味，令味道更有層次，而韓式醬則為牛肋骨添上濃厚香氣，配絲苗白飯一齊食，絕對能夠滿足食肉控。

甜品款式多樣，每款都精心製作，有香甜軟糯嘅桂花糖不甩、杞子桂花糕、大熱嘅開心果慕絲蛋糕、帶有陣陣茶香嘅茉莉花茶白桃蛋白餅等，仲有曲奇、蘋果金寶、清熱潤燥嘅腐竹薏米糖水以及多款Mövenpick雪糕。無論食得幾飽，都一定要嚟返幾款甜品先夠喉！

大堂咖啡廳有高質素嘅美食同舒適嘅環境，快啲嚟試吓呢個既抵食又高質嘅半自助晚餐，美食盛宴等緊你！