sesamema1021's Profile

原來粉嶺開咗間新嘅西餐，可惜位置比較隔涉，不過裝修都幾靚幾有氣派，而且仲有生蠔食！🍽️日本蠔 $30@1隻 (跟餐優惠價)我哋略嫌生蠔set有啲多，所以散叫咗兩隻。今日嘅生蠔係日本生蠔，食落鮮甜、肥美厚肉，帶有Creamy嘅口感，好新鮮。有機會下次可以試埋其他產地嘅生蠔！🍽️炸魷魚鬚 $68份量幾多，新鮮炸起出爐熱辣辣上枱。炸魷魚鬚外皮好脆，同時炸粉唔會太厚，好惹味。🍽️南瓜蟹肉焗酥皮湯 (升級套餐後+$20)餐湯我哋升級咗做焗酥皮湯，賣相幾吸引。南瓜湯非常濃稠，配上少許蟹肉絲增添口感及鮮味，味道濃郁而且豐富，好鮮甜！🍽️地中海漁夫海蜆意粉 $128海蜆份量充足，無沙及碎殼。意粉帶有少許香草味甜甜地幾好味但唔覺有辣味，意粉口感偏硬身，個人幾鍾意。🍽️美國牛小排蒜香欖油意粉 $188之前睇某個韓國綜藝已經好想食嘅橄欖油意粉，終於俾我食到！欖油意粉香氣逼人，調味得宜，麵條煙韌彈牙，同時加入多種配料令口感及味道非常豐富！另外意粉上嘅牛小排更加係加咗唔少分數，牛小排非常軟滑，只稍微用火槍燒過，帶有濃烈焦香及牛香氣，配上炸蒜片食好夾！係我近期粉嶺食過數一數二嘅西餐，唔錯。…Read More

再一次經過餐廳樓下，見推出咗新menu，有十幾款新菜式，決定去試下。餐廳喺酒店內，除咗基本室內座位，亦有吧枱及室外座位。我哋被安排到坐吧枱，可以睇住調酒師喺面前調酒。店員及調酒師都好nice好有型，打扮得好時尚，氣氛好好。🍽️香煎帶子 $138帶子略煎至焦香，鮮甜濕潤。底下嘅鷹嘴豆蓉好綿密，淡淡嘅豆香加入蜆汁以提升香氣，再配上三文魚籽無可挑剔。🍽️阿根廷紅蝦肉吞拿魚蓉他他 $128吞拿魚蓉內有阿根廷紅蝦肉，令他他有少許彈牙口感，味道非常鮮甜。他他內亦添加咗少量芥末，同時令味道層次更豐富，中和魚肉嘅油膩感。配上三文魚籽、墨魚籽後風味得到昇華。🍽️北海道直送海膽扁意粉 $218海膽好新鮮清甜，意粉好掛汁，每條意粉都充滿住濃郁嘅海膽鮮甜香氣，好creamy，濃郁而不膩。🍽️日式豆腐糕寶雲酥羊肋排 $228羊肋排香氣撲鼻，係完美嘅五成熟。外層金黃酥脆、內裡鮮嫩多汁。燒汁有輕微嘅芥末味刺激鼻腔，層次豐富。法式千層薯批烤焗得帶有焦香味及表面鬆脆，帶有濃郁嘅薯仔香氣，口感好特別。🍹Pure Pearl $140好鍾意呢杯酒，每啖都會飲到唔同嘅香氣！榛果香再加上柑橘香氣，入口清新。濃郁嘅木瓜味配上尾調淡淡嘅椰子清香，有複雜而持久嘅餘韻。🍹Lily Fizzy $90餐廳自家製菊花梳打非常清香甘甜，配合荔枝甜中帶少許酸味，整體唔會好甜，飲完口腔內充滿花香，好特別。總括而言餐廳氣氛非常好，食物及飲品都好滿意，完美體驗到糅合意大利及日式風味嘅fusion菜。會有下次！~…Read More

幾次路過都見到餐廳門外誇張嘅人龍，今次終於扚起心肝排隊試下！大概八點門外仍有超過20位客人等待！餐廳氣氛唔錯，好熱鬧，店員勤快有禮貌，不過食物款式唔係好多。🍽️泰式青芒沙律 $68泰國青芒配上青瓜絲、洋蔥等，加埋酸辣嘅醬汁好開胃惹味！好鍾意佢嘅乾蝦仔，帶有濃郁嘅鹹香蝦味。青芒果爽脆得嚟偏軟身，酸味過後會有芒果嘅甜香飄出嚟，唔錯，可以接受酸辣程度較濃郁嘅人可以一試。🍽️泰式虎蝦金邊粉 $88食泰國菜絕對唔少得嘅Pad Thai！雖然顏色偏淡但味道正宗，唔會太甜，辣味亦剛剛好。值得一讚係金邊粉條條分明，乾身得嚟仲帶有彈性，煙煙韌韌真心唔錯。🍽️泰式街頭炸魚 $138幾乎枱枱都叫蠔餅，但怕太大份所以冇叫。結果叫咗份炸魚試下，以為係魚柳size諗唔到竟然係原條炸魚！炸魚顏色好靚，色澤均勻。魚肉濕潤滑溜，骨比較粗身大條唔多骨刺仔。外皮焦香加上炸蒜味道大大加分，點埋醬汁酸酸辣辣更濃泰式風味。🍹芒果沙冰 $32芒果沙冰打得好勻循，冇碎冰粒，入口軟滑感覺似奶昔質地。芒果香氣十足，甜味中帶微微酸味飲到停唔到口！成杯沙冰唔會過甜~「泰」滿足，價錢喺旺角嚟講亦唔算貴，下次可以挑戰埋炸蠔餅同火山排骨！…Read More

好耐冇食韓國嘢！今次喺佐敦地鐵站附近搵咗間有韓式炸雞嘅餐廳食晚餐，地方唔係好大平日七點入座幾乎滿座。餐廳提供多款一人及多人套餐可以選擇，價錢實惠。我哋叫咗二人套餐B($238)及一份肉鬆芝士蛋卷。🍽️肉鬆芝士蛋卷(四件) $38蛋卷輕盈鬆軟，蛋香味濃郁，配上芝士、茄汁、肉鬆味道更佳。相比平時大大份嘅韓式蛋卷我哋覺得呢個份量較好，唔會過量。🍽️招牌無骨炸雞拼盤(牛油蜜糖) 炸雞外皮唔會好厚重，牛油密糖口味令炸雞件甜甜哋感覺冇咁肥膩，忍唔住一啖又一啖咁食！雞件無骨，啖啖肉進食非常方便。另外炸雞旁仲有醃蘿蔔、沙律及小食(炸韓式餃子、黃金帶子、魷魚蝦枝)，味道都唔錯。🍽️部隊火鍋份量頗多，除咗拉麵外配菜仲有午餐肉、腸仔、魚糕、肉等。湯底好濃郁，唔會好辣。🍽️韓式辣炒年糕年糕外仲有魚糕、泡菜、雞蛋，醬汁比部隊火鍋辣。年糕非常煙靭，唔會過熟口感唔錯。吸滿醬汁嘅魚糕亦好好食～🍹蜂蜜生薑茶 +$5生薑茶薑味濃郁但唔嗆口，同時唔會好甜，感覺非常健康養生。🍹鳳梨青檸梳打 +$8梳打飲落初時只有鳳梨味，尾調先有青檸味浮出嚟，好清新解渴。埋單$300都唔使食到好飽，抵食！…Read More

成日路過水門雞飯嘅分店都以為剩係得雞飯食，今日仔細睇Menu先知原來仲有好多其他泰式嘢食，咖喱、船麵、湯、串燒等樣樣齊。🍽️足料椰汁雞煲 $68椰汁雞煲係呢排嘅新品推介，$68跟埋飲品好抵食。雞煲內雞件唔少，肉質嫩滑而且入味。椰汁湯底帶有濃郁嘅奶油香氣，香料及菇亦好足料唔馬虎，忍唔住一啖又一啖繼續飲，如果跟埋飯會更好。🍽️泰式炒鳳尾蝦金邊粉 $78炒金邊粉一直都係我好鍾意食嘅泰國菜~金邊粉色澤好靚，配菜有豆皮、雞、芽菜、鳳尾蝦等。鳳尾蝦幾大隻，清脆爽口。金邊粉集酸甜鹹辣於一身，辣度唔會好辣，整體偏甜，加上青檸汁好開胃惹味。🍽️泰式無骨豬手(例) +$30豬皮部分近乎入口即溶，豬手肉非常軟糯入味，滷水鹹香上帶啲香草味，甜甜哋，無骨好容易進食。成個豬手啖啖肉好開胃、爽口。🍹泰式奶茶 泰式奶茶有濃郁嘅茶香、香料味、甜味同奶香，層次豐富。整體風味濃郁而唔會過甜。🍹菠蘿冰 $29沙冰打得好勻循，飲落冇大碎冰粒。菠蘿嘅酸甜好適合喺食完辣嘢後飲，好解渴。抵食！…Read More

喺深水埗搵到間性價比高嘅鐵板燒!Bar枱座位唔係好多，建議想坐吧枱需要提前訂座。我哋叫咗鳥海山鐵板二人套餐，$1198已經有活鮑魚及龍蝦，價錢相當吸引！刺身一共有四款，店員有介紹食用次序。帶子鮮甜；深池魚爽滑肥美，魚油甘香細膩；油甘魚肉質細膩，香氣濃郁。鮑魚用咗牛油煎香，未入口香氣已經湧出嚟。鮑魚厚度適中容易入口，爽口彈牙同時帶有甘甜嘅鮮味。龍蝦淨係賣相已經好吸引！滿滿嘅龍蝦膏包裹住去殼嘅龍蝦肉，每一啖都充滿略帶鹹味嘅鮮味。另外龍蝦肉肉質Q彈飽滿，相當新鮮。龍蝦頭內仲有少量肉，店員亦有提供濕紙巾抹手，非常細心。雖然鵝肝多士係一口嘅份量，但係鵝肝份量完全冇偷工減料！鵝肝相對厚身，入口即溶，綿密細膩，帶有濃郁嘅香氣及淡淡嘅甜味。牛肉薄燒火喉控制得啱啱好，牛肉燒完仍然好嫩。薄燒香氣四溢，蒜同牛嘅鮮美結合令味道更加濃郁誘人。炒飯色澤均勻，飯粒粒粒分明可見鑊氣充足。炒飯蛋香味濃郁，配上櫻花蝦乾為炒飯帶嚟少少海洋風味。野菜有非常濃郁嘅牛油香氣，再飲埋麵豉湯已經飽，最後甜品仲有雪米糍！呢個價錢食到有活鮑魚同龍蝦嘅鐵板燒性價比極高，店員亦好殷勤不斷加水服務周到，短期內會再去！…Read More

黑雨過後嚟咗MOKO食晚飯，見到呢間餐廳裝修好清新，食物好有西日融合嘅感覺，水果夏祭主題好特別！🍽️能登海鹽炸北海道甜蝦蓮藕脆片 $98個人好鐘意食Nachos，而呢個就好似用蓮藕脆片取代芝士脆片嘅豐富版本。蓮藕脆片脆卜卜略帶海鹽鹹味，脆片上面亦有車打芝士醬、酸忌廉、香辣肉醬、牛油果莎莎，超滿足！北海道甜蝦亦好有驚喜，酥脆得嚟亦帶有濃郁嘅乾蝦香，為成個菜式加咗唔少分數。🍽️長腳蟹棒牛油果蟹籽壽司塔可 $72以酥脆嘅炸紫菜取代玉米餅，好特別。除咗面頭嘅長腳蟹棒、牛油果同玉子外，下面亦有生菜、飯、青瓜、蕃茄等。紫菜好酥脆，長腳蟹棒燒得好焦香，配上牛油果食好creamy。🍽️原條牛骨髓西班牙辣肉腸義大利飯 $168巨型嘅牛骨髓下亦鋪滿意大利飯，份量充足。牛骨髓上加咗蒜，令香氣更上一層，除咗帶有濃郁嘅牛骨香氣亦帶有少許甜味，入口順滑。意大利飯粒粒分明，熟度控制得啱啱好，配上牛骨髓油脂更為出色。🍰蓮霧藍莓拿破崙蛋糕$78蓮霧同藍莓都好甜，酥皮好酥脆，吉士醬份量啱啱好，整體味道唔會太甜。🍹菠蘿青瓜迷迭香氣泡飲 $58諗唔到菠蘿同青瓜咁夾，飲落兩邊香氣好平衡，夾得嚟好清新，解渴之餘好適合夏天飲用！🍹手搖香芒冰咖啡 $68DIY手搖咖啡後倒入芒果果醬攪拌就可以飲用，咖啡略帶酸味整體唔會太甜，加上果肉幾特別。唔錯~…Read More

平日夜晚七點經過餐廳門外已經有十個人左右喺度排隊，大約排左十五分鐘就有位，餐廳有上下層，下層全部係吧枱，氣氛幾好。🍽️原隻軟殼蟹天婦羅 $48軟殼蟹幾大隻，咬落唔會成口炸粉，幾香幾多肉，配上飛魚籽同紫菜食好好味，價錢公道。🍽️煎鵝肝配蘋果 $58鵝肝味道濃郁細膩，口感柔軟，入口似奶油咁喺口中融化。鵝肝同蘋果一齊食，爽脆嘅口感中和咗鵝肝肥膩嘅感覺，幾夾。🍽️自選天婦羅定食 $30起定食除咗飯，仲可以揀凍或熱嘅烏冬、蕎麥麵，亦跟埋湯同沙律。我哋叫咗冷酢橘蕎麥麵 (+$8)，湯底酸酸甜甜幾清爽開胃。天婦羅方面叫咗鮮帶子 (+$18)、帆立貝 (+$12)同紫菜蝦膠 (+$12)。帶子同帆立貝都幾鮮甜，中心部份仲好濕潤；紫菜蝦膠味道好夾，唔錯。🍽️海老穴子天丼 $108天丼賣相非常吸引，金黃色嘅天婦羅鋪滿成個碗面！呢個丼好啱我呢啲選擇困難症心大心細咩都想試吓嘅人～天婦羅有穴子、黑虎蝦、蟹柳、南瓜、本菇、紫菜同四季豆，每款都炸到金黃色，炸粉均勻唔會好厚，食落外脆內軟而唔油膩。米飯上充滿特製醬汁，結合咗酥脆同鮮味，好好味。穴子味道清淡爽口，肉質細膩；黑虎蝦肉口感爽口彈牙而且鮮甜，整體唔錯有日本嘅質素。🍨炸菠蘿雪糕(海鹽雪糕) $28炸菠蘿片連雪糕一齊食一凍一熱幾得意！食完炸物食返啲酸酸甜甜嘅甜品好清爽！整體唔錯，難怪平日都咁多人排隊！…Read More

平時都好中意食辣嘢嘅我哋今日去咗九龍城食川菜！餐廳位置有啲隔涉不過唔難搵。餐廳設計有啲似小茶樓，入面有十人左右嘅大枱，都幾闊落。🍽️四川薑爆鴨 $168見呢個小菜喺招牌菜入面，叫咗一份試吓。薑爆鴨色澤幾靚，薑嘅味道濃郁，帶少少酸味幾開胃。配菜筍絲幾吸味，份量都幾多。🍽️辣子雞 $143一講到辣嘢就會諗起辣子雞先，叫咗一份好彩冇令我失望！中辣辣度啱啱好，出到嚟唔會好多油而且好夠火候夠唒乾身！花生夠脆口，雞件份量多，粒粒都好入味味道均勻惹味。🍽️牛油黃金蝦 $168黃金蝦幾有驚喜，蝦好大隻，口感結實彈牙。蝦殼外層包覆住滿滿嘅金黃色醬汁，第一啖食落帶濃郁牛油香氣，之後鹹蛋黃味喺口腔慢慢爆發出嚟，味道啱啱好唔會過鹹同時一啲都唔油膩，好啱餸飯！🍽️四川擔擔麵 $40擔擔麵湯底濃厚，除咗蒜香仲有啲奶油香氣，花生同芝麻香配上花椒辣味飄香會忍唔住一啖接一啖咁食。麵嘅質地亦相對有咬口，唔會過淋。$40呢個價錢真係非常抵食！整體唔錯，下次試埋佢哋嘅烤魚！…Read More

天氣又凍返，近近哋揀咗間火鍋放題食晚餐！我哋叫咗A餐($298/位)，除咗刺身、頂級牛、海鮮拼盤係一次性提供外其他嘢飲、食物都可以任食。湯底係煲咗五個鐘無味精嘅花膠雞湯，加入雞件及花膠後滾起即可食用~花膠雞湯湯底金黃，味道鮮甜，帶有濃郁雞香氣及花膠膠質口感。雞肉非常鮮嫩滑溜，花膠口感軟糯，完全無腥味。我哋每人飲咗約兩碗，感覺好滋補！飲完湯食完雞就可以加清湯打邊爐。頂級牛盛盤有牛小排、牛肩胛、牛板腱、一口牛，牛小排及肩胛好嫩滑好濃牛肉味，質素唔錯。海鮮拼盤好豐富，有蝦、魚、蠔、鮑魚等。鮑魚好彈牙，加入花膠雞湯一齊食好夾！除咗基本常見嘅丸類、餃類同肉類，亦有少量小食。台灣腸多汁、惹味；荔枝蝦丸彈牙、爽口。飲品選擇都好多，基本碳酸飲品外仲有茶類、啤酒等。甜品櫃入面有布甸、泡芙、布朗尼，仲有多款口味嘅雪糕。人均$300就可以食咁多嘢仲有花膠雞湯，幾抵。…Read More

最近天氣涼涼哋，做完facial喺附近搵咗間韓國刀削麵試下~餐廳門面望落都幾地道，內部裝修簡單。餐廳除咗有招牌刀削麵，仲有餃子、年糕、煎餅等。餐前附送嘅泡菜偏甜、唔辣，幾啱我口味。🍽️花蛤刀削麵 $78湯頭尾調有花蛤嘅鮮味，幾清甜，刀削麵上嘅蛋絲同紫菜亦幫湯提升香氣，唔錯~花蛤大隻、無沙。刀削麵口感帶少許煙靭彈牙，份量偏大份。🍽️辣拌刀削麵 $78另一碗麵專登叫咗份凍嘅，個人認為凍刀削麵口感更加彈牙爽口！拌麵色澤均勻，同平時食開嘅韓式石頭鍋飯有少許相似，但辣度及香氣更濃郁！拌麵上亦有牛腱，牛腱好腍帶有濃郁牛肉香氣。🍽️五花肉泡菜煎餅 $68表面睇落平平無奇，夾起身先知有驚喜！煎餅反轉夾咗原片五花肉片一齊煎，五花肉肥瘦適中，為煎餅帶嚟更濃郁香氣。另外煎餅口感有少少煙靭，幾好食。見隔離枱嘅餃子好大件，下次都可以試吓！…Read More

喺新城市廣場兜咗個圈，俾呢間有超長年糕嘅韓國菜吸引咗！平日夜晚七點到幾乎滿座，好彩唔使排好耐就有位~餐廳內好多韓風海報，幾有氣氛，幾乎每枱都有點年糕鍋！🍽️麻辣年糕鍋 $248見好多枱都係叫酥炸魷魚皇年糕鍋，賣相好靚好澎湃，可惜我哋仲想試個香雞，所以叫咗比較細份量嘅麻辣年糕鍋。雖然睇落冇咁大份，其實份量亦好足、有：花狀粉耗子、寬粉、腐皮、維也納腸、魚糕、年糕等配料，食完基本已經飽！玫瑰醬喺韓國好紅，今次試完返唔到轉頭！韓式辣醬加上少許蕃茄味味道更豐富，而且奶香味濃郁甜辣開胃一啲都唔膩！寬粉、粉耗子同年糕都好煙韌彈牙，而且好掛汁，連埋有所加成嘅玫瑰醬食真係忍唔住一啖接一啖食。🍽️煙燻蜂蜜芥末香雞 $223香雞顏色好靚，雞上有炸洋蔥同手切薯片，賣相好吸引。香雞係原隻上，有啲難處理，但係肉質好軟嫩，用鉸剪好易剪開，肉亦都好容易分離。香雞有濃郁嘅煙燻香氣，好入味，配上蜂蜜芥末醬層次豐富。手切薯片比較厚身，新鮮出爐到最後都脆卜卜~太鍾意個玫瑰醬同年糕，絕對會為咗年糕鍋返兜！…Read More

上次食過劉興記嘅爆汁生煎包一直對佢念念不忘，今次去咗大圍分店食，排隊人龍同外賣生煎包嘅人仍然好多！入座提供嘅凍豆漿唔甜，帶有濃郁豆味，唔夠可再叫店員添加。🍽️鮮蝦濃湯生煎包(2隻) $28對上一次食咗原味同蟹皇味生煎包，今次叫咗鮮蝦濃湯味。生煎包底部煎得好焦香，入面加咗原隻蝦肉，令肉餡咬落更加有口感同時多一份鮮味。咬落口時熱辣辣，皮薄餡多，肉汁喺口腔內爆發，唔建議著白色或新衫！🍽️糖醋炸排骨 $30炸排骨份量好適合小小地加餸，酥脆嘅排骨加上酸酸甜甜嘅糖醋醬汁好開胃。排骨冇雪藏味亦唔難咬，唔錯。🍽️招牌炸雞扒拌麵 $45拌麵份量幾大碗，口感唔錯，好夠味。炸雞排外皮酥脆而且炸粉唔會太厚，炸完出嚟裏面肉質仍然鬆軟濕潤，果然係招牌。🍽️香煎豬排菜飯 $45茶飯比較乾身，菜粒份量唔少，每啖飯都食到淡淡嘅菜甜味，會令人想一啖又一啖咁繼續食。豬排好淋好入味，冇雪藏味，餸飯食唔錯。抵食，難怪經常排長龍！…Read More

觀塘好多隱世餐廳cafe,今次嚟到成業工廈覓食。餐廳位置比較隱蔽，但內裏環境及氣氛唔錯，星期六晚八點入座仍然滿座。🍽️墨西哥牛肉餡餅 $78餡餅入面包住墨西哥香料牛肉餡，口感軟腍，內有拉絲熱溶芝士，外有芝士醬，好邪惡！餅皮外圍脆卜卜，口感唔錯~🍽️自選沙律 $98沙律有唔同配料及醬汁可以選擇，我哋揀咗無花果同炒雜菇配意大利油醋汁。沙律比想像中大份，擺盤精美。炒雜菇香氣撲鼻，無花果亦好甜。除咗沙律菜亦有柑、蕃茄、青瓜等，又靚又健康！🍽️牛油果香草醬野菌意大利粉 $128意粉好掛汁，每一條都充滿住濃郁嘅香草味。醬汁內有粒粒牛油果肉及各種野菌，口感唔錯，份量亦相當大份。🍽️特濃開心果忌廉麻糬梳乎厘 $158重量級梳乎厘出沒！兩大件巨型厚身嘅梳乎厘加上勁量特濃開心果忌廉同麻糬，呢個組合非常吸引！梳乎厘軟腍濕潤，有濃郁嘅蛋香。忌廉帶有超濃郁嘅開心果香氣加上超級綿密順滑嘅口感非常滿足！麻糬亦好煙靭軟糯，成個梳乎厘口感豐富~🍹芒果菠蘿沙冰 $48沙冰打得好滑，沒有任何碎冰，同時感受到芒果嘅甜同菠蘿嘅酸係口腔爆發，好適合夏天飲用。🍹海鹽Kiri芝士奶蓋白桃烏龍(凍) +$20奶蓋好滑好濃郁，茶味香醇，啱怕甜嘅朋友，幾解渴。工廈中唔錯嘅西餐~👍🏻…Read More

喺旺角揀咗間扒房食飯，餐廳好有懷舊嘅感覺，氣氛幾好，平日晚市都幾多客人。晚市套餐除咗有鐵板肉類，仲有意粉、焗飯。入座已經即刻上咗餐湯同餐包比我哋。叫咗一紅一白湯，紅湯好多料，另外餐包暖笠笠好軟熟。🍽️鐵板珍寶什扒配薯菜 $138雜扒堆疊得好高賣相好吸引，當中有雞扒、豬扒、珍寶腸、太陽蛋及薯菜。肉類冇雪藏味，又大片又厚身，雞排充滿焦香且內裏濕嫩。另外亦加咗份意粉($10)，意粉份量唔少，可以喺上面再淋上醬汁，軟硬適中。🍽️鐵板煎牛舌拼肉眼牛扒配薯菜 $158好少見鐵板餐有牛舌，幾特別，同時亦比牛舌份量嚇親。牛舌非常軟腍，帶有彈性及濃郁嘅牛香氣。而肉眼我哋叫咗七成熟，火候控制得好好。肉眼肉質非常嫩滑，食落充滿肉汁。肉眼好厚身及大片，加上兩片大牛舌食完真係好邪惡！最後仲送咗細個好鍾意食嘅杯裝啫喱！啫喱入面有菠蘿粒，好有誠意！抵食！…Read More