後尾發現原來係之前有幫襯過嘅「越旺美食」舊班底係原區重開，之前已經好有水準。
雖然新鋪面唔算大，但內部環境十分乾淨同舒適，店員十分友善有禮，落座後仲推介我地可以嗌啲乜，而且晚市仲有套餐可以揀。
2
馬來濃湯蝦摻掺店員極力推介呢款摻摻，果然無介紹錯。超級濃郁嘅蝦湯，有三隻大蝦，幾片魚片頭，配有豆卜通菜。摻摻意思係將油麵同米粉兩種唔同口感嘅麵條混合係一齊，油麵本身口感彈牙，但較唔易吸收湯汁；而米粉則能夠充分吸收湯底嘅精華。將兩者混合一齊食，可以同時享受到油麵嘅口感同米粉飽吸湯汁嘅美味，創造出豐富嘅層次感。加埋秘製醬，更加係一試難忘。
咖喱牛腩配印度手工薄餅
咖喱可以自選辣度，十分貼心。香濃充滿椰香味嘅咖喱，相當惹味。牛腩配有少量牛筋，十分腍身同入味，配埋酥脆嘅手工薄餅，沾咖喱一齊食，完全係完美配搭。
小食方面：越式酸辣鳳爪、越南小食拼盤
份量比想象中大份，十分足夠。越式酸辣鳳爪係我男朋友嘅最愛，每隻鳳爪都大大隻，去骨乾淨，而且十分爽脆，酸酸甜甜恰當好處，係唔錯嘅開胃菜。
越南小食拼盤，分別有春卷、扎肉、串燒、雞翼、蝦片，十分豐富。特別春卷、雞翼炸至金黃香脆，蝦片上亦有少量粉絲、炸蒜及肉碎，十分特別。
凍越南咖啡、珍多冰
主食跟餐嗌特飲可以半價，相當劃算。當中越南咖啡好夠特別，用金屬滴漏濾杯，慢慢萃取出濃縮咖啡液，然後店員再俾一杯冰杯我地，將滴漏完嘅咖啡倒落去，充滿咖啡香味。而珍多冰中，綠色粉條軟滑中帶點Q彈，加入左西米令口感更豐富，同時唔會太甜太膩。
整體而言，性價比極高，食物質素亦相當唔錯，十分推介馬來濃湯蝦摻摻、各款咖喱菜式，同地道嘅越南咖啡，相當有東南亞風味。
