唔食都尤自可，食完真係：好好味啊！我同朋友一共叫咗兩碟雙拼飯，一碟係叉燒油雞，一碟係燒肉燒鵝髀。老細同老闆娘超好人！一入去坐低就送咗兩碗自家製靚湯，真係好飲，重點係足料，冇落味精（利申：小弟味精敏感）老細仲要每碟飯送多半隻鹹蛋，好耐冇試過鵝油鹹蛋撈飯，好滿足😮💨啲叉燒真係塊塊肥叉，入口即溶，燒肉每塊半肥瘦都唔再講，最緊要係個皮真係好脆。油雞個味好好食，唔係大家平時食到大家樂/太興嗰啲水平，好嫩好滑唔會過咸。燒鵝更加唔使講...肥而不膩，個皮仲要脆脆地😋我絕對夠膽講，真係唔差過國金軒叉燒個啲米芝蓮燒味👍
除咗嘢食，仲要老闆佢哋一家人都好有人情味。同佢哋閑聊，兩個老闆原來喺各大燒味檔做阿頭都做咗好多年，兩兄弟一齊開舖。疫情後市道唔好，都想搞返旺個市，俾啲真正好食既燒味香港人食👍佢哋真係值得更多人認識。🫡
1
