滿福庭

Open Now

Now Closed

放假就約媽咪到觀塘APM商場飲完茶再行街，我哋就選擇咗去到鱷魚恤中心7樓福滿庭飲午茶，喜歡這裏環境寬敞坐得好舒服，點心質素不錯。餐紙上有午市特價點心及炒粉麵。豉椒排骨炒河豉椒的味道香噴噴，河粉炒得好有鑊氣，每一條都掛上醬汁，排骨啖啖肉好入味。古法馬拉糕馬拉糕即叫即蒸，入口好鬆軟，不會過甜。鮑汁炆雞腳一鍋大約有五至七隻，炆得好淋，入口骨肉分離，一隻接一隻食唔停口，花生都好入味。鮮蝦菜苗餃一籠有三隻，餃皮好薄肉眼都見到餡料，蝦肉鮮甜爽脆，蔬菜嫩嫩綠綠，加入小小辣椒醬一齊食味道更加豐富。

聖誕長假期同爸媽去飲下午茶，呢間酒樓位置方便，新淨光猛，坐得幾舒服，下午茶有多款特價點心，性價比唔錯。蟹子燒賣（2件）＄12.8我哋點了四件，燒賣大大粒，充滿冬菇香氣豬肉同蝦嘅比例好好，食落很爽口。月半彎水晶蝦餃皇（頂）$45.8賣相很不錯，蝦餃隻隻都很飽滿，晶瑩粉嫩，蝦餃皮爽滑黏口，入邊蝦肉筍絲爽口。潮州蒸粉果$17.8大大隻，好抵食入面很多爽口的沙角，加埋韭菜同花生，很香口。山竹牛肉球$23.8啖啖肉，牛肉嫩滑。老干媽蒸金錢肚（特）$38.8個醬汁很惹味，金錢肚厚身大大件，爽口，蘿蔔吸入醬汁，腍甜可口。蟲草花鮮竹卷$27.8不經油炸嘅鮮竹卷，很健康，腐皮充滿豆香，入邊餡料除咗豬肉有多款蔬菜，個湯很清甜。花菇棉花雞 $29.8魚肚大大件，雞肉嫩滑。蜜汁叉燒包$19.8叉燒包嗰個都爆多餡，醬汁多，個包鬆軟。蜜糖脆蛋散$12.8好抵食的一個甜品，蛋散鬆化。

昨晚我們一行九個人到滿福庭慶祝冬至。由於女多男少，我們為了不浪費食物，提前預訂了半席的乳豬星斑宴，還另外點了三個餸。入座後，我們詢問職員飲品的情況，職員告訴我們包了六罐汽水，並詢問我們想要什麼口味。但隨後她又表示沒有，男經理卻大聲說只有半席才有飲品。可是我們明明是預訂了半席呀？男經理堅持只有半席才包含飲品，你們六人不算! 冬至是一個全家團聚的好日子，我們也不想在這個喜慶的時刻為幾罐汽水爭論。不過，真的希望餐廳能更清楚地解釋一下，六人和半席之間的區別到底是什麼？如果六個人不算半席，那麼到底多少人才算一席？ 就算職員與我們確認餐單時也以半席來形容，或許男經理嫌我們消費太少吧!最後的評價是，服務的職員都非常有禮貌，但男經理的態度就顯得差了一些，食物也只是普通，並不特別好。總的來說，我們決定不會再光顧了！香港人北上消費是有原因的，這不僅僅是價錢的問題，更是態度的問題。希望香港的餐飲業能夠快點認識到自己的問題所在。

一行5人訂咗晚上6點食冬至飯主要叫小菜食，包括:菜芯苗 - 味道算正正常常，菜芯苗有少少硬蟹黃海皇豆腐煲 - 無蟹皇味，蝦碎到食唔到有味，豆腐算滑，但好細舊。最後先上呢道菜，無影到相。咕嚕黑豚肉 - 咕嚕汁味道正常，但係肉質硬，無曬肉汗，完全唔似黑豚肉柚子大蝦球 - 本身叫左柚子大蝦球，點知黎左黃金蝦球，唔想麻煩就照食。size 細，份量少到好似人哋食剩菜都算，果層炸粉味道勁鹹，入面蝦肉就完全無味。可能係要蓋過本身蝦既雪味，所以俾黃金蝦球我哋。最差呢個餸，2百幾蚊俾啲垃圾俾客人食。 以下張相片係一上枱就影。翡翠炒龍躉球 - 龍躉肉好鹹，肉質唔鞋，有啲油。相比其他，已經算正常。服務: 有家人未食完，已經收起其他人嘅碗筷。一食完，即刻幫你埋單，完全係趕客之道….總結: 味道差，份量少，材料唔新鮮，服務差，完全令人失望。唔會再嚟食，北上消費，唔係無原因！！

細個已經鐘意飲茶，觀塘鱷魚恤呢間滿福庭食過兩次，日日都好多人，要預啲時間等位🥢海百花蒸釀秋葵呢款好食，好清新好正氣，又有啲汁料，幾濕潤🥢陳皮叉燒酥個人最鍾意，呢款好好食！好酥化，外面甜甜酸酸，似檸檬味因為有啲檸檬香，入面係叉燒，多汁好食🥢蝦餃皇細個次次都食，大咗都唔例外，正正常常🥢香煎蘿蔔糕外面微脆，好軟熟嘅質感🥢香茜牛肉腸牛肉稔滑🥢灌湯餃第一次食餡料「海皇」全部料打碎晒，同出面嘅有啲唔同

鱷魚恤中心美食林立，今天跟爸爸到訪七樓的中菜廳「滿福庭」享用午餐；店內面積寬敞四正，用上大量懸垂水晶吊燈盡顯大氣-🔹午市點心超值自選▶️鮮蝦菜苗餃晶瑩剔透的外皮粘糯輕韌，內裡載滿翠綠鮮嫩的菠菜苗及爽彈的蝦肉，令人滿足▶️蜜汁叉燒腸做到皮薄餡足，腸粉外皮柔嫩輕彈，帶有米漿味道；叉燒份量足，肉質緊緻帶啖啖蜜汁香，配合少量芫茜更滋味▶️迷你滑蛋鮮蝦仁滑蛋份量十足，炒得嫩滑富蛋香，同時保留適量蛋汁；蝦仁得體大隻，鮮甜爽彈，整體調味恰到好處▶️迷你滿福小炒皇材料豐富有蝦仁、蝦乾、北寄貝、香菇、腰果、韭菜及菜脯等，加入 XO 醬炒製而成；蝦仁爽鮮、蝦乾鮮甜、北寄貝嫩彈、腰果香脆、韭菜爽嫩，配搭鹹菜脯及 XO 醬，口感及味道層次皆豐富且惹味-🔹祝壽大蟠桃壽星月當時要點蟠桃，壽包大個圓潤，包體綿密細緻，蓮蓉幼滑而甜度適中，鹹蛋黃鮮香起沙

週末假期，最適合與親友相聚飲茶，慢慢享受。我最近光顧了位於 apm 商場旁的滿福庭，這家酒樓的環境非常舒適，落地玻璃設計讓整個空間顯得開揚，而特大螢光幕則讓我們在品嚐美食的同時，也能隨時關注新聞。👍❤️香煎蘿蔔糕這道香煎蘿蔔糕外脆內軟，表皮金黃酥脆，每一口都能感受到蘿蔔的清香，搭配上甜醬辣醬，十分美味。🧡蠔皇叉燒包蠔皇叉燒包的皮薄餡多，叉燒的味道濃郁，搭配蠔皇醬的鮮美，讓人一口接一口，完全停不下來。💛花菇棉花雞這道點心的雞肉鮮嫩多汁，搭配香菇的獨特香氣，多塊厚切棉花口感豐富。💚半肥瘦叉燒腸粉腸粉的滑嫩程度恰到好處，半肥瘦的叉燒切得厚薄適中，配合甜豉油，十分滋味。💙紅燒妙齡乳鴿這道紅燒乳鴿色澤誘人，肉質鮮嫩，入口即化，讓人感受到廚師的用心。💜蜜糖脆蛋散經典傳統甜品唔係到到有，蜜糖脆蛋散的甜度剛好，外層酥脆，滿滿嘅蛋香配上蜜糖成結尾的完美之選。

觀塘鱷魚恤中心有好幾間酒樓，今個週末同屋企人黎到飲下午茶。潮蓮燒鵝湯米線(碗) $45.8湯底清澈，米線滑順，吸附著湯汁，燒鵝外皮香脆，配合燒鵝的油脂，令米線都掛滿肉汁香味。蟹子燒賣(2件) $14.8外皮薄透，內餡鮮美，蟹子為燒賣增添了鮮甜的味道。皮蛋瘦肉粥 $14.8粥底煮得恰到好處，米粒綿滑，皮蛋的鹹香和瘦肉的鮮嫩完美融合，好滿足。安蝦咸水角 $21.8外皮酥脆，非常軟糯。內餡豐富，每一口都能感受到鮮蝦的鮮甜，搭配微微的鹹味，非常可口。山竹牛肉球 $25.8牛肉球內裡肉質鮮嫩多汁，腐竹滲透住牛肉汁，有豐富層次感。南乳蒸豬手 $23.8豬手肉質軟嫩，南乳的味道濃郁，好入味。蟲草花鮮竹卷 $29.8鮮竹卷搭配清新的蟲草花，每件都滲滿湯汁，好暖胃。

上星期有屋企人生日，所以在滿福庭訂了一圍晚飯慶祝，整體感覺很好，環境衛生舒適，食物質素中上，服務態度十分滿意。🔅乳豬全隻食落唔會偏肥或偏瘦，十分香口🔅雙蚌炒時蔬珊瑚蚌新鮮爽口，但炒時蔬略嫌有少少多油🔅炸蝦球酥脆可口，結實彈牙🔅瑤柱髮菜生菜瑤柱好大粒，髮菜生菜好食🔅清蒸老虎斑條魚唔會太熟，蒸得啱啱好🔅炸子雞香脆唔油膩，外脆內肉嫩🔅鵝掌鮑魚鮑魚同鵝掌都好大隻，鮑汁香濃🔅壽包入面有蛋黃，蓮蓉唔會太甜

假日喜歡飲茶，點心款式眾多，又有午市優惠。滿福庭場地夠大夠寬敞，而且有電視觀看。安蝦咸水角 $35.80質感煙韌軟糯，餡料份量適中。鮮蝦菜苗餃 $38.80水晶皮夠薄，鮮嫩菜苗包著爽口蝦肉，比例剛好。上海小籠包 $38.80嘩好大粒巨型大粒仍保持薄皮，咬開好多肉汁流出。紅燒乳鴿 $68外皮脆卜卜，肉質嫩滑多汁永和鎮鮮竹牛肉球 $34.80牛肉球大粒飽滿多汁見到有推車的木桶豆腐花，當然要食一碗豆腐花 $23.80，份量十足，有豆香。

今日同屋企人一行五人接近中午到訪早茶優惠到11:59止，問樓面計入單定離座，佢話入單計，不過茶錢就以離座計有兩張點心紙都有早茶優惠，樓面見我入一張，好心提醒仲有另一張都有優惠，我示意冇心水點心隔咗5分鐘，大約11:55樓面再好心提醒睇我有冇嘢要加，勁貼心-點咗早茶點心孖寶$44.8，一個鱆魚肉餅飯拼叉燒腸，叉燒腸皮好滑有米漿味，唔會太濕，叉燒夾埋芫茜質素唔錯另外叫咗一個點心拼盤$33.8，有5款點心各1件，分別係蝦餃、素餃、菜苗餃、粉果同叉燒包，屋企人大讚素餃、粉果同菜苗餃都有質素，至於叉燒包同蝦餃我就冇問到-仲有午市套餐，2款點心拼1-4款自選小食/小菜/燒味/粉麵飯，我哋揀咗4款，分別係叉燒、蝦仁炒蛋、菜遠牛肉同雪菜火鴨絲炆米，除咗叉燒，全部標明係迷你，但係嚟到碟頭絕對唔算迷你；點心就揀咗菜苗餃同南乳豬手菜苗餃最終原來漏咗單，南乳豬手炆得夠腍又入味，份量仲好夠叉燒排得整齊，脂肪比例低所以偏少少乾柴，有嚼勁，淡淡蜜汁香未算好入味，屬合格水平蝦仁炒蛋份量好夠，炒蛋好香夠嫩又唔油，蝦仁鮮爽，非常有質素！菜遠牛肉選用菜心苗，仲擇走咗菜花，翠綠夠嫩炒得爽口，牛肉好大片，口感爽滑仲有少少牛肉香

周六與家人在「滿福庭」嘆茶共樂天倫，大堂寬闊無柱遮擋，樓底又高，舒適感極佳。 五彩鮮蝦炸雲吞~視覺上令我感覺是錦鹵雲吞的迷你版， 甜酸醬裏沒有八珍配料，簡簡單單的大片雲吞皮，咬落脆卜卜，吃到鮮嫩蝦肉又是另一個層次的味道，蠻不錯的。上海小籠包~皮薄、肉餡味鮮汁多。香噴噴流沙包~流沙包口感柔靭，看着金黃香甜奶黃餡慢慢流出，非常有吸引。鳳城薑汁雙皮奶~香濃嫩滑又營養豐富，可是略嫌薑味較淡。 蜜糖脆蛋散~舖滿椰絲碎的脆蛋散，很有細緻口感，滿滿的蜜糖墊在蛋散下，可以隨意蘸多或少，非常有誠意的蜜糖脆蛋散。法式焦糖燉蛋 ~燉蛋上多了一片焦糖，味道多了一份甜和脆，燉蛋也為乾燥的天氣帶來一份滋潤美意。 七味炸魷魚鬚和七味黃金豆腐~兩份上火小食，酥香味美，一爽一嫩，配合得宜。醒神孖寶: 鳳爪排骨飯~和乾炒肉絲河~既美味可口，也有醒神能量又飽肚的孖寶。

今天到觀塘APM商場購物，順道先到隔鄰鱷魚恤中心7樓的「滿福庭」午膳。餐廳地方開揚，寬敞，枱與枱的空間闊落，沒有壓迫感。盡頭有特大螢光幕，裝修明亮整潔，環境清雅。午市特價點心都有多款選擇，甚受歡迎，所以午市時段都座無虛席。我點了幾個喜歡吃的點心：“香茜牛肉腸”，腸粉皮又薄又滑，餡料多，而且調味不錯，有芫茜香味，非常超值。“蟲草花鮮竹卷”，鮮竹卷豬肉餡料調味得宜，不太鹹，配上蟲草花上湯，特別滋味。“香脆綠茶餅”，特色甜品，綠茶餅混上炒香芝麻，份外香口，中間是糯米粉餡料，脆中帶軟，雙重口感。“豉椒排骨飯”，排骨肉質爽口，配上青紅椒及惹味豆豉，味道也不錯。“脆皮燒腩仔”，真正皮脆肉嫩，三分肥肉，七分瘦肉，肉質爽口彈牙，是必食之選。“薑汁雞包仔”，大大隻，餡料調味佳，包皮鬆軟，是超值的點心。離開前見旁邊有幾個大魚缸，養住新鮮生猛海鮮，我便想到晚市來嚐嚐海鮮餐。

今日同屋企人飲早茶，經街坊介紹觀塘有間好抵食的茶樓。坐得舒服，乾淨衛生，早市有特價點心和孖寶，真係好抵食！馬蹄牛肉球（2件）以$8.8性價比高，牛肉加咗馬蹄，增添了爽口的口感，值得推介。潮式糯米卷不過不失，夠暖胃飽肚。醒神孖寶--鳳爪排骨飯好受歡迎，枱枱都有一碟，鳳爪排骨份量足，米飯粒粒分明。-- 蟹子燒賣皇大大粒，有蝦有肉，仲有蟹子。晶瑩芋粒餃呢款比較少見，芋頭現在當造，有芋頭香。碧綠帶子卷主要餡料為帶子和蝦，外面包左層菜，矜貴得來夠健康。七味炸魷魚鬚好大碟，以魷魚鬚為主，重口味人士之選。山水豆腐花不過不失，尚算香滑。

朋友嚟香港玩幾日．話想飲茶食點心帶佢嚟觀塘呢間酒樓皆因坐得舒適．鄰近地鐵站方便易搵早午市．下午茶時段炒粉麵飯 同 點心都推出不同優惠點心即叫即蒸．熱辣辣有水準午市套餐$158可以自選2款點心 + 1款主菜✨豉汁涼瓜班腩炒河即叫即炒．多汁又惹味班腩厚肉．份量十足✨鮮蝦菜苗餃✨晶瑩芋粒餃晶瑩通透．餡料飽滿仲有多款點心只係$20.8✨排骨陳村粉✨香茜牛肉腸✨安蝦鹹水角✨蠔皇鮮竹卷整體食物有質數．價錢抵食朋友話下次再嚟香港都要再嚟呢間